Tu’u mai pea le Tau’au o Niu Sila e Fesoasoani ai ia Samoa

0
59

 

E ui i a’afiaga ua o’o iai le lalolagi ma Samoa nei ona o le fa’ama’i oti o le Koviti lea ua tele ina tapunia ai ala o femalagaiga faava-o-malo, peita’i, e le o mafai ai ona nofonofo le Pulega o Tagata Tafafao Maimoa mai Fafo e ala i ni faigapa’aga ma isi Malo e fesoasoani e una’ia pea le tele o atina’e mo turisi i Samoa nei.

O le vaiaso nei lea na mafai ona molimauina ai e le to’atele o le mamalu o le atunu’u i Savaii ia le tatalaina aloa’ia o nisi o poloketi ua mafai ona fa’aleleia ona o le agalelei o le Malo o Niu Sila e tauala mai i le polokalame ua fa’aigoaina o le STSP (Samoa Tourism Support Programme) e ala lea i le fa’aleleia mata’aga, atoa ai ma nisi o auala o fa’amatalaga e fa’afaigofie ai ona malamalama tagata lautele i nei mata’aga.

I lana saunoaga autu na fa’aalia ai e le afioga i le Minisita Lagolago o Turisi ia Fagaivalu Kenrick Samu, le agaga fa’afetai ona o le agalelei o le Malo o Niu Sila e ala i se vaega seleni e o’o atu i le $421,347 tala Niu Sila ua mafai ai ona fa’atupeina nisi o fuafuaga e o’o atu i le lima (5) a le Ofisa o Turisi.

O nei poloketi e aofia ai se tusi o fa’amatalaga i mata’aga (Samoa’s Geological History and Natural Sites) e pei ona tusi ma tu’ufa’atasia e le susuga ia Tuapou Warren Jopling.

O le isi poloketi o le fa’aleleia ma le si’itia o mata’aga e tolu i e aofia ai le Vaitafe o le Afu o A’au, Lava i Sale’aula ma le aga o le La’auoleola i Aopo.

O le isi fa’amoemoe na fa’atupeina i lenei seleni e aofia ai laupapa fa’ailoilo ma fa’amatalaga mo nisi o mata’aga e pei o le Auala Savali i Falealupo,  o le Vae o Moso, Fafa o Saualii, Aga o Tagata Pupuu atoa ai ma le Mata o le Alelo.

E fitu ni laupapa ua mae’a ona saunia aua lava se malamalama’aga o tagata lautele aemaise lava o tagata tafafao maimoa mai fafo i nei mata’aga ma o latou tala’aga.

E le gata i lea ua mafai foi ona saunia ma ni kalone lapisi mo mata’aga taitasi ma ofu fa’aola atoa ai ma moli uila aua lava turisi asiasi mai.

O le vaega fa’ai’u o nei poloketi e lima o se polokalame ua fa’aigoaina o le “Tafaoga” e pei ona pu’eina e le TV1 e ala i le faigapa’aga ma le Pulega o Turisi (STA) ina ia maimoa le lalolagi i le lanulau’ava o le si’osi’omaga ma mata’aga o lo’o i le atunu’u atoa.

Na fa’amauina ai le agaga fa’afetai tele o le afioga ia Fagaivalu i lana afioga i le Komesina o Niu Sila ia Dr Trevor Matheson ona o le tu’u mai pea o le tau’au o Niu Sila e fesoasoani ai ia Samoa aemaise o le atina’ega o tagata tafafao maimoa mai fafo.

I le saunoaga a Fagaivalu na ia ta’ua ai ua tele le pa’u maulalo o le pasene o tagata asiasi mai i Samoa nei i le tausaga fa’aletupe lenei lea ua fa’amauina ai e 30 pasene lea ua pa’u maulalo ai pe a faatusa i le tausaga fa’aletupe ua mavae.

E le gata i lea ua pa’u ai foi ma le tupe maua mai le $514 miliona i le tausaga fa’aletupe talu ai i le na’o le $358 miliona i le tausaga fa’aletupe lenei.

Saunoa Fagaivalu e le’o se tulaga e fa’apopoleina ai le atunu’u ae ia galulue pea ina ia fa’atino polokalame o loo mafai ona tuuina mai e Malo ma Pa’aga mai fafo e mafai ona fesoasoani ai pea e una’ia tulaga i le tamaoaiga o le atunu’u e ala i le atinaeina o turisi i Samoa.


Marieta H Ilalio