29 Tesema 2019. A’o le’i amataina le sauniga o le faatautoga o Alii Faamasino fou mo le Faamasinoga o Fanua ma Suafa i le taeao nei sa muai faailoa mai e le tamaitai Ofisa Sili o Pulega Susuga ia Moliei Vaai, ina ia tutulai le aofia atoa ai ma le laulau a le faamasinoga mo se minute o le filemu, e manatua ai e ua maliliu i le faama’i o le misela i le atunuu.
E toa 79 i latou ua maumau le soifua ma le ola, e toatele ai lava nai fanau, ona o le faama’i o le misela.
O le tofa ia Tuloa Aiono sa tulai e fai ma sui o le toafitu o faamasino fou e saunoa mo le faamoemoe i le aso, ma tali atu i le laulau a le faamasinoga ma le aofia sa potopoto.
“O aso faapenei e fiatagata ai le Samoa, ae paga lea e faamalulu atu ona o lea ua faalava le amoa, talu ai ona o lea tatou te iai i le faamalosia o puipuiga ona o le faama’i, ia ua tonu ai le manatu sei uma õ le aiga ia e fai le latou ipu tī.”
E masani ona vaaia tulaga nei i le maea ai o faatautoga, o le faaaloalo a aiga poo se tausiga mama foi mai le matagaluega o faamasinoga.
Ae o le asõ ua ese ona o le faataua e le matagaluega o le sa a le malo ona o le faama’i o le misela.
(0)
