O le aso ananafi lea sa toe tutulai ai o luma o le Faamasinoga Maualuga le toa sefulu ma le tasi o i latou ua molia e leoleo i le osofaiga lea sa maua ma faaleaogaina ai ni maumaga mariuana tetele i le afioaga o Faleatiu.
Sa faatautaia e le alii Faamasino ia Leiataualesa Daryl Clarke, ma sa maitauina le eseese o alii ma tamaitai loia e tutu mo e ua molia.
O moliaga o le umiaina o fualaau ma laau faasaina o le mariuana, atoa ai ma le umiaina o laau malosi ma ututau e le faatagaina i Samoa, atoa ai ma le umiaina o ututau e leai se pemita.
Iakopo Iakopo ma Fauea Faavae
O loo molia ni alii ae toalua ia Iakopo Iakopo ma Fauea Faavae i le maua ai o mariauana ia tei laua lea e tusa ma le 17 sikareti ua maea ona taai e tusa le mamafa ma le 9.1 kalama faapea ai ma laau mariuana e tusa le mamafa ma le 0.2 kalama
Sa tulai le alii loia ia Leuluaialii Tasi Malifa e talosagaina le tatala i tua o nei alii e toalua ona e leai se la agasala. Sa taua e Leuluailiiàalii, o Iakopo ma Faavae e omai uma i Afega ma e leai se mafuaaga e taofia ai ana clients ona sa o atu i laua nei e vele a la maumaga talo i le taimi tonu sa osofaia ai e leoleo lea faaitu.
O Iakopo Iakopo o loo nofo vaavaaia (probation) ona sa tuu avanoa iai le Faamasinoga ae peitai e lei oo atu lava i le polokalame.
O Fauea Faavae, faatoa tulai lea i se Faamasinoga (first offender).
Tuanai Loka poo Tua Satia Leota
O le alii o Tuanai Loka poo Tua Satia Leota o loo molia i lona faamiliina lea le laau faasaina o le mariuana i Faleatiu i le aso 8 o Novema, lea e tusa lea ma le 10,964 laau. E le gata i lea o lona umiaina o le ututau e le faatagaina i totonu o Samoa lea e tusa ma le (8) 308 kilipa, (3) 303 kilipa ma le (1) 243 kilipa.
Na faapea fo’i ona maua i lea alii laau malosi e le faatagaina i totonu o Samoa lea e iai le (2) 12 gauge, (1) 22 rifle ma le (1)303 rifle. E le gata i lea o loo moia foi lea alii i le leai o se laisene faatulafonoina o nei laau malosi.
Malaesili Sinapati ma Alisa Sinapati (ulugalii)
O Malaesilia Sinapati ma Alisa SInapati o loo molia foi i le osofaiga lava lea a leoleo i Faleatiu ina ua maua ai ia i laua fatu o le laau faasaina o le mariuana.
O le alii o Malaesilia Sinapati o loo iai aafiaga tumau o le soifua ma lona tolua o Alisa e na o le 17 tausaga le matua.
O lea ulugalii sa faatagaina ona tatala mai i tua e faatalitali ai le faamasinoga ona o aafiafa tumau o le soifua.
O loo tulai Unasa Iuni Sapolu mo lenei ulugalii.
Kirifi Lealaitagomoa poo Kirifi Palau ma Senerita Maluolefale poo Senerita Asi Malu (ulugalii)
O Kirifi Lealaitagomoa poo Kirifi Palau o loo molia faatasi ma Senerita Maluolefale poo Senerita Asi Malu ina ua maua le 160 fatu o le laau faasaina o le mariuana, faapea ai foi ma le tagapepa o lala mariuana e tusa ma le 13 lala i lona mamafa e 30.0 kalama atoa ai ma lau mariuana e tusa lona mamafa ma le 14.9 kalama.
E le gata i lea o loo molia foi lea alii ina ua maua ai e leoleo kilipa e (4) 22 atoa ai ma le 42 ututau o le ituaiga 22 calibre long rifle.
Sa tulai Josie Sapolu mo lenei ulugalii.
Fotu Baby Sanele Mo’a (nephew o Tagaloasa Filipaina)
O le alii o Fotu Baby Sanele Mo’a o loo molia i lona tauaveina lea o se taavale laupasese o le toyota numera o le laisene T3935 i le auala agai i Faleatiu e aunoa ma se faaetete ma ano i galuega o loo faia a leoleo.
Sa tulai le tina o Fotu e talosagaina le tatala i tua o lona alo ona ua leai lava se isi na te tausia o ia. O lenei foi tina, o le tuafafine o Tagaloasa Filipaina o loo taofia nei i Tanumalala i le fasioti tagata faamoemoeina faapea ma le umia o fualaau faasaina.
Sa tulai le tamaitai loia ia Treena Atoa mo lenei alii.
Uili Manuleleua, Fereti Fereti ma Paratiso Toailoa
O loo molia faatasi lava Fotu ma Uili Manuleleua, Fereti Fereti, ma Paratiso To’ailoa i moliaga o le umiaina lea o ni sikareti mariuana ma se paipa e ula ai aisa i totonu o le taavale lenei na maua ai i Faleatiu.
O loo molia foi i le umiaina o ututau e leo faatulafonoina e (16) 9mm ammunitions.
O loo vaaia le valaau eseese o mataupu faatatau ia i latou nei e fua i le taimi na maua mai ai e tusa ai o sailiga a Malu o le Malo.
Sa taua e nei alii e toatolu, o Unasa Iuni Sapolu le latou loia peitai sa tali Josie Sapolu, sei faafesili pea le afioga ia Unasa i lea tulaga.
(273)
