Faa-Samoa

Tusia le Tala Faasolopito: Ulua‘i Fonotaga a le Kapeneta i Savai‘i

September 18, 2026

331

Sooupu a le Malo. 𝐔𝐋𝐔𝐀’𝐈 𝐅𝐎𝐍𝐎𝐓𝐀𝐆𝐀 𝐀 𝐋𝐄 𝐊𝐀𝐏𝐄𝐍𝐄𝐓𝐀 𝐈 𝐒𝐀𝐋Ā𝐅𝐀𝐈 𝟐𝟎𝟐𝟔. Afai e lelei mo Upolu, e lelei fo’i mo Salāfai.

O le afioga i le Palemia, Susuga i le La’aulialemalietoa Leuatea Polāta’ivao Fosi Schmidt, o le Palemia Filifilia lona valu o le Mālō Tuto’atasi o Samoa.

O ia foi o se Palemia lona tolu mai Salāfai, ma ua ia manatu ai, ina ia usuia mo le ulua’i taimi se Fonotaga a ia ma lana Kapeneta Filifilia i Savai’i.

O le Aso Lulu 16 Setema 2026, lea sa faataunuuina ai lenei ulua’i fonotaga i le tala faasolopito o le Malo o Samoa.

O se Fonotaga ua fa’ai’ugāfonoina ai nisi o fa’ai’uga aloā’ia a le Mālō mo le manuia lautele o Samoa aoao.

O se ‘ai fo’i lea i le tula’i mai o le Faigāmālō a le Fa’atuatua i le Atua Samoa ua Tasi [F.A.S.T.], ua ta’oto mai ai se ata manino, o le amanaia o tagata uma, ma le gafatia lava ona fa’atino so’o se fa’amoemoega aloā’ia a le Mālō i Savai’i.

O lea Fonotaga aloā’ia e pei ona masani ai i Aso Lulu o vaiaso ta’itasi, sa fa’ataunu’uina lea i le Potu Fono i le lālā a le Fa’alapotopotoga o Fa’aputugātupe mo le Lumana’i Manuia o Tagata Samoa [S.N.P.F.] i Salelologa i Savai’i.

Saunoa le Ta’ita’i o le Mālō, Susuga i le La’aulialemalietoa, e tāua tele le fa’atino o nisi fonotaga fa’apitoa a le Kapeneta i Salāfai, e pine fa’amau ai e mafai fo’i ona fausia nisi fa’ai’uga tetele aloā’ia a le Mālō i Savai’i mo le manuia lautele o Samoa mo ā taeao.

O lenei Fonotaga na maua ai fo’i ma le avanoa e auai atu ai nisi o Fa’auluuluga o Matāgaluega ma Fa’alapotopotoga Tumā’oti a le Mālō, e soālaupule nisi o matā’upu tāua e fitoitonu i le atina’eina o le tamāo’āiga o le atunu’u.

O lenei fonotaga o lo’o taulāmua ai le afioga i le Palemia, afioga i Minisitā o le Kapeneta fa’atasi ai ma le Failautusi o le Kapeneta le tōfā iā Agafili Tomaimanō Shem Leo ma le Matāgaluega a le Palemia ma le Kapeneta.

E tasi le aso sa usuia ai lea Fonotaga i Savai’i.