Ua faamautinoa mai e le Sui Faipule o le Itumalo Tu Taulaga i Sasae poo le Urban West, le Afioga ia Faumuina Leatinuu Wayne Fong, o ia o loo tumau pea o se Sui Faipule a le Vaega Faaupufai o le HRPP e ui ina talosagaina lona tula’i ese.
O le Aso Lua 12 Me ina ua toe a’e mai galuega o le aso malolo a tinā, sa feau mai ai le Sui Faipule e le Taitai o le HRPP le Afioga i le Alii Palemia, Tuilaepa Sailele Malielegaoi.
Ua faamautinoa mai e Faumuina Leatinuu, o lea feiloaiga sa talosagaina ai ia e le Alii Palemia, e faamavae atu i le Vaega Faaupufai o le HRPP. Peitai, e nā te le’i faatinoino lea tulaga ona e leai se mafuaaga tatau, poo se itu matuiā foi ua tulai mai, e ono faamavae ai fua.
Tā’ua e Faumuina Leatinuu, e afua mai lenei mataupu ina ua maua e Tuilaepa se faamatalaga e uiga i se fonotaga a le latou afioaga o Gagaifo, Lefaga sa faataunuuina i le Aso Gafua 11 Me 2020.
“O se fonotaga faapitoa a le matou nuu o Gagaifo Lefaga i le aso malolo e talanoaina ai le mataupu e uiga i tulafono e 3 o lo’o lauliliu ai nei le Palemene”.
Sa tā’ua e Faumuina o lea fonotaga sa auai ai se matai o le latou nuu, o se loia o loo mau tofi foi i le Sosaite Loia a Samoa.
“O se tamaitai e matai foi i le matou alalafaga i Gagaifo, Lefaga”.
Saunoa Faumuina, o finagalo ma manatu sa faaalia i lea fono, o finagalo lava o le nuu e soalaupule ai, ma faatalanoaina mataupu e siitia ai se malamalamaga o le afioaga e uiga i tulafono taufaaofi.
E tolu tulafono ua maea ona pasia faitauga muamua ma le lua i le Palemene, e aofia ai teuteuga i le Faavae o Samoa ma teuteuga i le Tulafono o le Faamasinoga o Fanua ma Suafa.
E tusa ai ma faiga masani pe a maea se Faitauga lona 2 o se Tulafono Taufaaofi, ua tuuina atu nei i luma o se Komiti Faapitoa a le Palemene, e latou te taliaina ma faamautu finagalo a soo se tasi lava o le atunuu e fia tuuina atu.
I le tatala ai o fonotaga a faiganuu i lalo o Tulafono Faapitoa a le Malo mo le Puipuiga o le Koviti-19, sa faataunuu ai loa le fonotaga a Gagaifo Lefaga e faatalanoa le mataupu o Tulafono Taufaaofi.
I lea fonotaga faalenuu, sa tā’ua e Faumuina Leatinuu Wayne Fong le faaali manino ai o lona finagalo i vaega o tulafono taufaaofi na te lē lagolagoina.
“Na fesiligia sou finagalo e uiga i le tulafono; ma ou te lē olegiaina foi le matou nuu i le Susuga i le Su’a aemaise Faumuinā o le Tupufia”.
“O matou manatu lā ia na faalia i le fono a le matou nuu, ua lipotia e se tagata i le Palemia i le aso na sosoo ai”.
E le mautinoa e le Sui Faipule poo ai sē sa oo atu e fai le galuega o le ta’u atu i le Alii Palemia mataupu faalotoifale o loo talanoaina i fonotaga mamalu a Alii ma Faipule o nuu ma alafaga.
“O sea tagata e lagolago i le Malo pe na te lagolago foi i le HRPP; poo fia alu foi i le palota, ia, poo se isi foi ua fialelei i le Palemia;
“O le mea sa’o lava ia, o fono a nuu ma itumalo, e le aiāina e le Palemia poo le Malo, o manatu lava o le nuu ma alalafaga e faaali i lo latou aia tatau, auā se manatu e momoli mai i le Komiti i tulafono o loo tau-faaofiofi nei”.
I le va nonofo ai ma le HRPP sa faailoa mai e le Sui Faipule, o ia ua silia nei ma le 40 tausaga o ona lagolago ma fesoasoani i lenei vaega faaupufai.
“Na ou HRPP mai lava i le tausaga 1980 a’o i ai lo’u uncle o Tuaopepe Tuigamala Anetipa Lam Sam i le Executive a le HRPP. Sa ou fai vaifafano ma ou ao fesoasoani mai kamupani sa lagolagoina le pati i lena vaitaimi, e oo mai ile taimi nei..ae maise o le pati na faavaeina mai i lo matou nuu o Vaiusu faapea le Itumalo Faleata”.
“E le fou nei lā lou lagolagoina o le HRPP”.
Saunoa Faumuina, o le maea ai o le faigapalota o le 2016 sa faatoa valaau atu ai le taitai o le pati e alu atu latou te galulue i le HRPP.
“E lei o atu le HRPP sii mai au. E lei aumaia foi e le HRPP se pau sene lava e tasi ou te tauva ai i le faigapalota. O la’u filifiliga ma la’u lava galuega na fai mo le tauvaga lea sa tofia ai i le faigapalota o le 2016”.
O le maitau a Faumuina Leatinuu, ua toatele i latou e fou atu i le pati i lenei vaitaimi, ma ua sui foi faiga, sui faavae.
E talitonu le Sui Faipule, e toa 48 sui mamalu o le HRPP o loo iai nei i totonu o le Palemene o Samoa, ma e lē na o le toatasi se tagata o iai, pe tasi foi se finagalo.
“Ua 61 nei o’u tausaga, ma e lē taina faapaufa’i foi le tofā ma le faautautaga; ua ou iloa foi le mea e lelei mo le atunuu ma le mea e faaletonu, e le tatau la ona ou lagolagoina ni mea faaletonu”.
Saunoa le Sui Faipule o Faleata, o le a tapena fiafia atu mo le faigapalota i le tausaga fou, ma o loo i lona Itumalo lava le tali.
“Ae o le taimi nei, o loo o’u HRPP ai lava faapea”.
- Two Samoa Lifters have Officially QUALIFIED for 2024 Paris Olympic Games - September 17, 2023
- Samoa Prime Minister Announces Cabinet Reshuffle: New Finance Minister and Two Additional Ministers - September 6, 2023
- Samoa Wins Two Gold Medals at Oceania Senior Wrestling Championships 2023 - August 9, 2023
