Aso Gafua 4 Setema 2023, Apia Samoa. Sa tulai Talalelei Pauga i luma o le Faamasinoga Maualuga a Samoa mo le uluai taimi talu ona malaga mai i se talosaga faapitoa na ave aloaia i le Malo o Ausetalia (extradiction order).
Sa malaga Alii Malu o le Malo mai Samoa, e faafeao mai Talalelei Pauga, se ia tali atu i tuuaina sa ia taupulepule faatasi ma Lema’i Sione faapea Malele Paulo ae maise Taualai Leiloa, e tagatavaleina pe faaoo le oti i lē sa fai ma Palemia, faapea lē sa fai ma Komesina o Leoleo ma Falepuipui.
Ina ua tolaulauina le mataupu a Pauga i luma o lana afioga ia Fepuleai Ameperosa Roma i le taeao o le Aso Gafua, sa talosagaina e le Ofisa o le Loia Sili se lua vaiaso se’i faamautu mai ai moliaga.
Peitai na teena e e lana afioga i le Faamasino le lua vaiaso, ae tuuina mai na o le vaiaso e tasi.
Saunoa Fepuleai, “Ua leva na tatau ona outou silafiaina ma faatulaga le faila o le mataupu lenei..”
Ua fa’aauau ai pea ona taofia Talalelei Pauga seia aulia le Aso 11 o Setema, lea ua tolopoina iai le mataupu.
O se avanoa foi lea e le gata o le faamautu mai o moliaga a le a itu a le Loia Sili, ao se avanoa foi lea mo le loia o loo tulai mo Pauga, e tapena ai se talosaga i luma o le Faamasinoga mo le tatalaina o ia i tua e tālia ai le faasologa o le Faamasinoga.
O le alii loia ia Tufuga Fagaloa Tufuga o loo tula’i mo Talalelei Pauga.
Na molimauina le faatumulia o totonu o le potu faamasino faapea fafo mai i le tapuaiga a uo ma aiga e faasaga ia Talalelei Pauga.
O se va’aiga e fou ia Pauga, o le iai lea o sana mata poo se vaaiga, ma lona lauao ua uumi.
O le Aso 11 o Setema o le a toe valaauina ai le mataupu.
