Sa tulai se tamā e tali atu i moliaga o le faia o se faigaaiga faamalosi e agai atu i lona lava afafine.
O moliaga e lua ua faamautu mai e leoleo, o le faia o se faigaaiga faamalosi e aunoa ma le malie o le na aafia (rape) faapea le faia o feso’otaiga tau feusuaiga ma se tagata laititi e i lalo ifo i le 16 tausaga le matua (sexual connection with a young person).
O loo faagasolo nei mau a le itu a leoleo, i luma o le tamaitai faamasino ia Tafaoimalo Leilani Tuala-Warren, faapea faatonu (assessors) i le faamasinoga maualuga o Samoa i le vaiaso nei.
O loo teena e lea tamā ona moliaga e tusa ai ma le tulai mai o lana loia ia Unasa Iuni Sapolu.
O le mataupu lenei e faapea suesuega a leoleo sa tulai mai i le aso 9 o Aperila 2019, e tusa ma le molimau a le tina o lē ua aafia.
O le molimau a le tina, sa ia taua ai o laua e toaono le la fanau ma lē ua molia, e toalua tama ma teine e toafa. O le afafine ua aafia o le lona tolu lea o le fanau.
Sa molimau le tina e faapea mai o le po o le aso 9 o Aperila o le tausaga ua mavae, ina ua maea le faigalotu o le afiafi ma le taumafataga, sa matamata loa le TV. O ia sa momoe ma lana tama pepe i le moega i le isi itu o le fale, ae o lana fanau e aofia ai ma lē ua aafia, sa matamata lava le TV i le isi itu o le fale.
“Ua ou faagalegale moe ae ou faalogoina ua maluluina lo’u tino. Ou tu a’e loa i luga e sue mai lo’u ieafu;
“Sa ou tago loa ki le moli; ae ou vaai loa le ofu laititi ma le ofuvae o si a’u tama o loo taatitia i tafatafa o le faamalu lea e taoto ai lo’u toalua;
“Na ou tago atu loa se’i le ieafu o loo aafu ai ae ou vaaia loa o telenoa uma laua.”
Sa ia faailoa na oso mai lona toalua ma tau sulu lona ie ma una’i ese mai ia ma toso lona lima la te o i fafo, la te talanoa ai.
Sa ia taua fo’i sa faapea atu lona toalua e aua le pisa ina nei feala tamaiti.
“Na ou fesili iai po o lea lana mea ua fai i le teine, ae fai mai, e le valea o le a ia faia ai se mea faapea i lona afafine.”
Na taua e le tina sa ia faamasinoina lana tama ma taua ai, o le 10 foi o ona tausaga sa fai ai foi e lona tama le mea faapea ia ia, ae o le 13 lea o ona tausaga i le taimi lea ia Aperila 2019.
Sa tuuina mai le molimau a le ua aafia ina ua fesiligia e loia a le itu a leoleo e pei ona tulai ai le tamaitai loia ia Ann Matalasi ma lona soa ia Lucy Sio Ofoia.
Sa faapea mai le ua aafia, a’o lei faia uiga mataga ia te ia, sa valaau atu lona tama e fia valu lona tua. Ina ua maea ona ia valuina le tua sa ia taoto ifo loa i le moega e moe. Sa ia taua le tatala o lona ofuvae ao moe, atoa ai ma le faia o uiga mataga e lona tama e ala i lona loteloteina o lona itutino sa, faapea ai le tuuina atu o lona itutino sa i totonu o lona itutino sa.
Sa tulituliloa e Unasa Iuni Sapolu le ua aafia ma taua ai e faapea e le moni nei faamatalaga ua tuuina mai, ona e foliga mai o se mea fafau. Sa tuuina mai e Unasa, ua mafua ona fafau lenei tala sese, ona o loo iai se alii o loo agai atu e fesoasoani i le aiga, ma e foliga mai o se uo a le tinā o le ua aafia, ma ua fiafia iai le fanau ona o loo maua atu ai tupe.
Na umi se taimi o tu’i fesili e Unasa Iuni Sapolu le ua aafia ona o lana molimau i le mea na tupu.
O le molimau a le alii fomai sa ia faailoa ai o loo iai aafiaga i le itutino sa o le ua aafia. Sa fesiligia e Unasa pe lei faia se DNA test e saili ai le suaola o le tama, faapea foi le DNA o le afafine e ala mai i lavalava. Sa tali le alii fomai ia Dr Fuifatu Tevaga e le’o mafai ona faatino i Samoa nei le ituaiga suesuega lea i DNA.
O loo faaauau suesuega a le Faamasinoga i lea mataupu i le vaiaso nei.
O le itu a leoleo sa tulai ai le tamaitai loia ia Ann Matalasi ma lona soa o le tamaitai loia ia Lucy Sio Ofoia.
