Tula’i se Ave Pasi o loo Tuuaia i le Uumia o Fualaau Faasaina

E 9.7 kalama o le fualaau faasaina o le aisa o le tuuaia ai le ave pasi..

0
541

O le vaiaso nei na tulai ai i luma o le Faamasinoga Maualuga se ave pasi o loo molia i lona uumia o fualaau faasaina.

O le alii o Faleniko Auatama, o loo tuuaia sa maua atu i se pekolo a leoleo (police patrol) o loo ia uumia fualaau faasaina o le aisa.

I faamaumauga a le itu a leoleo, o le Aso 20 o Fepuari na maua atu ai Faleniko o loo ia te ia se taga pepa o loo iai le fualaau faasaina o le aisa e tusa ma le 9.7 kalama (9.7 grams).

I faamaumauga a leoleo, o le maketi i Sogi sa tula’i mai ai lea osofaiga.

O se masini mai le Malo o Niu Sila sa faimeaalofa mai ai i le Matagaluega o Leoleo, lea na faaogaina e faamaoniaina ai o le aisa (methamphetamine).

Sa toe tuuina atu foi mo nisi suesuega a le vaega o le SROS (Scientific Research Organisation of Samoa).

E leai se loia na tulai mo Faleniko Auatama, ma e le’i tuuina atu foi sana tali i moliaga.

Ae ua toe faatulaga mai e le afioga i le Faamasino iā Fepuleai Ameperosa Roma le vaiaso fou e toe valaau ai lenei mataupu ae sei saili se loia e tula’i mo lē ua molia.