O le taeao ananafi sa tutulai ai i le faamasinoga maualalo i Mulinuu Lauitiiti Tualima ma Aniseko Vaelei i moliaga o le sosola i tua ma le falepuipui i Tanumalala i le Aso 6 o Oketopa 2019.
O se taimi muamua lenei ua sosola ai i tua ni pagota mai le falepuipui i Tanumalala. Sa maitauina le lē fiafia o le Kapeneta, ma latou faamalolo le tumau ai loa le Komesina o Leoleo ia Taito Edward Winterstein, ma lē sa tiute i lea po.
O loo ioeina e le alii o Lauitiiti moliaga o lona sola ese mai le falepuipui, peitai o le alii o Aniseko Vaelei o loo manao e totogi sana loia e tulai mo ia, pe afai lena e tuu atu le avanoa e fesootai atu ai lona aiga. Sa faailoa e le alii faamasino ia Leota Raymond Schuster e le mafai ona maua se loia e totogi e le Malo mo lea alii (legal aid).
E lua la vaiaso ua tuuina atu ia Aniseko Vaelei e faafesootai ai sana loia ma lona aiga, ma e tatau ona oo atu i le aso 3 o Tesema o le tausaga nei ua maua se tali o se loia e tulai mo ia. Ua faailoa atu foi e le faamasinoga afai ae oo atu i lea aso e lei maua se loia, o le a tali mai loa lea alii i ona moliaga o loo ua i luma nei o le faamasinoga, e le toe faatali foi le faamasinoga i le sailia o sana loia.
Ae o le le alii o Lauitiiti Tualima lea ua ia ioeina ona moliaga, o le a faailoa mai le faaiuga a le faamasinoga i le aso 6 o Mati o le tausaga fou.
Sa talosaga lava le alii o Lauitiiti i le faamasinoga ma lona malamalamalaga o loo faasala i laua i le taimi nei.
“Lau afioga ile alii faamasino o le mataupu lea faasaga ia maua, o loo iai le faasalaga o loo faia ia maua i le taimi nei, o lea ua toe molia maua ae o le taimi nei o loo fatino le faasalaga ia maua, o le talosaga atu lea e fia maua se fesoasoani.”
Sa faailoa e le alii faamasino o le ioe pe tetee i moliaga o le tulaga na lea o loo manao iai le faamasinoga, i le maea ai o lea saunoaga a le alii faamasino, na tali ioe atu ai loa Lauitiiti i ona moliaga o le sola ese mai le falepuipuii i Tanumalala.
(0)
