23 Oketopa 2023, Apia Samoa. Ua ioe nisi o ē sa molia mai se osofaiga a leoleo i Moataa, i le uumia o fualaau faasaina, ae o loo teena nisi moliaga o loo faasaga ia i latou.
E toaono sa molia mai i le Aso 23 o Setema ina ua faatino se osofaiga a leoleo, ma maua atu ai se tinoitupe e tusa ma le $10,000 tala faapea ma fualaau faasaina o le marijuana ma le aisa.
O Junior Roache sa ia ioeina moliaga o le uumia lea o se pepa iila o loo iai le fualaau faasaina o le aisa e tusa lona mamafa ma le 0.13 kilokalama (kg).
Sa faatulaga ai lava e le Faamasinoga le Aso 22 o Novema e tuuina mai ai se faasalaga o lea moliaga ua faamaonia.
Ae mo Francis Nauer ma Simau Sauni, o loo la’ua teena moliaga o loo faasaga ia i laua. E la te lē taliaina le tuuaiga a leoleo, sa la uumia fualaau faasain sa maua atu e leoleo.
O Ilaita Tafili, ua toe faatulaga le Aso 30 o le masina nei e toe tulai ai, ae sei faamautu mai moliaga a le itu a leoleo. O Ilaita Tafili, sa molia muamua foi i se osofaiga a leoleo sa faatinoina ia Iulai o 2021, i Maaali Street Vaitele.
I lena osofaiga i Vaitele ia Iulai 2021 sa maua atu ai se tinoitupe e $23,300, o ni laau malosi i le ituaiga e faasaina i Samoa (handguns) o aisa faapea ma surveillance cameras poo mea pue ata sa faapipii solo i lea maota.
O le Aso 23 o Setema 2023 na agai atu ai se osofaiga a leoleo (raid) i Moataa i le nofoaga o le pisinisi ua faaigoaina o le Tafaifoe, ma taofia mai ai i latou nei.
Mo Franacis Nauer ma Simau Sauni, o loo tula’i ai le alii loia iā Quentin Sauaga. O Ilaita Tafili o loo tula’i ai Unasa Iuni Sapolu, ae o Junior Roache, sa ia faailoa i luma o le Faamasinoga e leai sana loia ae ua sauni e tali moliaga faasaga ia te ia.
E na o le toatasi ua talia e le Faamasinoga le talosaga e tatala ai i tua (on bail). E le’i teena e le itu a leoleo le talosaga e tatala ai i tua Simau Sauni i lalo o aiaiga masani.
E taofia ona pepa malaga, nofo tumau i Vini Fou, saini i le ofisa o leoleo i Apia i Aso Lulu ma Aso Faraile uma. Ma ua faasaina foi ona taumafai e faafesootai nisi o i latou o loo tula’i faatasi i lenei mataupu.
O lenei osofaiga e fesootai poo se osofaiga faaauau o le osofaiga sa faia i Puipaa lea e toasefulu ē o loo molia ai.
Public Notices
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
