Tulai ni Alii Talavou e Tali Atu i Moliaga o le Faigaaiga Faamalosi

0
453

 

14 Iulai Mulinuu Apia Samoa. O le aso ananafi lea na tutula’i ai i luma o le Fa’amasinoga Maualuga ni alii talavou se to’alua lea o lo’o tu’ua’ia i le moliaga o le faia o ni faiga’aiga fai fa’amalosi (rape) e pei ona failaina e le itu a leoleo.

O i la’ua nei o Falaniko Fatu ma Paulo Tui e ta’i 20 ma ona tupu tausaga le matutua, ma sa lē mafai ona tu’uina atu ni a la tali i luma o le Fa’amasinoga Maualuga se’ia vagana ua iai ni a la loia e tula’i mo le la mata’upu. Na saunoa le afioga i le Fa’amasino Sili ia Satiu Simativa Perese e fa’aalia, e tatau ona faia ni a la loia ona e fai si ogaoga o le moliaga o lo’o tu’ua’ia ai i la’ua nei.

E le misi le vaiaso ma moliaga tau faamalosi I le lisi a le Faamasinoga Maualuga o Samoa.

I pepa o fa’amatalaga a leoleo e tusa o lenei mata’upu o lo’o fa’aalia ai, o nei alii o lo’o tu’ua’ia i lo la fa’atinoina o ni faiga’aiga fai fa’amalosi i se tama’ita’i e 25 tausaga le matua i le aso 20 o Iuni o le tausaga ua tea, 2019.

E lē o ta’ua le afio’aga na tupu ai lenei soligatulafono o lo’o tu’ua’ia ai i la’ua nei ona o le puipuiga i le tama’ita’i na a’afia, ae o lo’o aumai pea le fa’atagaga e fa’ailoa ai igoa o i la’ua uma nei, ona e leai so la so’otaga vavalalata ma le tama’ita’i na a’afia.

O le Aso Gafua o le vaiaso fou lea ua toe tu’u atu e le afioga i le Fa’amasino Sili mo le fofogaina o lenei mata’upu, se’ia saili ni loia a nei alii talavou. 


Marieta H Ilalio