I taualumaga o le Faamasinoga Maualuga (Supreme Court) i lenei vaiaso, sa faamaonia ai le filifilia e le Ofisa o le Resitala o le tamaitai loia ia Muriel Lui i lalo o le polokalame fesoasoani a le Malo (legal aid), e tula’i mo Malele Paulo poo King Faipopo.
Sa talosaga Muriel Lui i luma o lana afioga ia Fepuleai Ameperosa Roma, mo se avanoa e tuuina atu sei feutagai ai ma Malele Paulo.
O le uluai taimi lea ua maua ai se loia e tula’i mo Malele Paulo talu mai lona savali ese mai le alii loia ia Quentin Sauaga lea sa tulai mo ia.
O Malele Paulo ma Lema’i Sione, sa faamaonia o la moliaga o le taupulepule e faaoo le oti i lē sa fai ma Palemia faapea lē sa fai ma Komesina o Leoleo a Samoa. O le vasega o Faatonu (Panel of Assessors) sa latou tuuina mai le faaiuga ina ua maea iloiloga a le Faamasinoga.
O nisi sa latou taupulepule faatasi e aofia ai ma Talalelei Pauga, lea ua faamaonia mai e le Loia Sili lona toe faafoi mai i Samoa nei (extradited) e tali i ona moliaga. Saunoa le Loia Sili ia Su’a Hellene Wallwork, e maua mai loa pepa o loo tālia mai le Ofisa o le Loia Sili a Samoa, ona malaga loa lea o leoleo e aumai Tala Pauga.
O lenei foi vaiaso sa tuuina mai ai e le Alii Faamasino ia Vui Clearance Nelson le Aso 30 o Iuni e lau ai faasalaga mo Malele Paulo ma Lema’i Sione.
Saunoa Vui, o lea ua tauaaoina talosaga mulimuli a le loia mo Lema’i Sione. Ae o le taimi lenei e tuuina atu mo le loia a Malele Paulo, le tamaitai ia Muriel Lui, e tuuina atu ai ana foi talosaga tusitusia ae le’i tuuina mai lana faaiuga.
O Taualai Leiloa, e toafā iai i latou sa molia faatasi e leoleo i lea taupulega e faaoo le oti. Sa ioeina e Taualai Leiloa poo Taualai Tuilaepa Leiloa ona moliaga uma, ma ia faamatalaina le fausiaina o lenei taupulega.
Molimau Taualai, sa avatu ia te ia se laau malosi poo se fana. Sa avatu foi ia te ia le taavale ma faatonuga e alu i le falesa katoliko i Siusega poo le maketi i’a, e maua atu iai Tuilaepa. Sa lafo mai fo’i i Ausetalia ni tupe mo ia.
O Tesema 2020 sa tuuina mai ai e le tamaitai faamasino ia Tafaoimalo Tologata Leilani Tuala-Warren le faasalaga e 5 tausaga i le falepuipui mo Taualai Leiloa.
O Vui Clearance Nelson o le a tuuina mai le faasalaga mo Malele Paulo ma Lema’i Sione.
