Ua tofia nei e le Palemene se Komiti fa’apitoa e latou te toe iloiloina le fa’aiuga a le Komiti Suesue o Fa’amasinoga (Judiciary Service Commission) e fa’amalolo lē tumau le Peresitene o Faamasinoga o Fanua ma Suafa le afioga ia Fepuelai Atilla Ropati.
O lea komiti e aofia ai: Nafoitoa Talaimanu Keti, Faumuina Tiatia Liuga, Aliimalemanu Alofa Tuuau, Faaulusau Rosa Duffy, Iti Taateo Setefano, Toleafoa Poutoa ma Fuimaono Samuelu Teo; Loia Sili Lemalu Hermann Retzlaff, Ofisa o Sulufaiga, Maiava Iulai Toma, Ofisa Sili o Faamasinoga ma le Ofisa Sili o le Palemene, Tiatia Graeme Tualaulelei.
O lenei mataupu sa faapea ona faailoaina mai e le Alii Palemia i le Palemene i le vaiaso ua tuanai atu.
“O se mataupu e ogaoga tele, ma sa lei mafaufauina o le a tupu mai i le tatou paeaiga lenei le tulaga lea o le tofiga mamalu o le Peresetene o le Faamasinoga o Fanua ma Suafa.
“O loo ua faagafua nei i se tulaga lē tumau i le faaiuga a le komisi o galuega a le faamasinoga e gafa ma tofiga a lea foi itu tino o le tafatolu o le faamasinoga.
“Ua uma foi ona tagofia e le komiti o le Judicial Services Commission peitai e le mafai ona taunuu i se faaiuga mautu sei vagana ai ua fai muamua iai se faaiuga a le Palemene i le faamuta o le tofiga pe faaauauina foi.”
Sa ta’ua e Tuilaepa o se taimi muamua lenei o le a faia ai e le Palemene se faaiuga e agai mo se faamasino, aemaise lava o le tofiga Peresitene o le Faamasinoga o Fanua ma Suafa.
Sa ia ta’ua foi o Fepuelai sa tofia ma Peresitene a’o fa’auluulu iai le Palemene i le tele o tausaga ua mavae.
“Ou te faatuina se lafo e faasee atu ai le mataupu lenei i le komiti faapitoa a le Palemene latou te silasila totoa i le faapogai ma le talafeagai o le faaiuga a le JSC ma toe lipoti mai ai mo se faaiuga faaiu a le Palemene lenei ina ua uma ai ona latou faatalanoa ma toe valaau molimau e fesoasoani atili i se latou tuualalo tuusao mai i le
Palemene.”
“O le alii peresetene ua aafia i lenei mataupu sa faauluulu iai le matagaluega lenei o le fono aoao faitulafono i ni tausaga se tele ua mavae atu, ma ua malamalama lelei foi iai a outou afioga ma e le toe tauiso ai i a outou afioga lona tomai, lona faamaoni ma ona uiga ma lana amio.
“Peitai o le moliaga e faasino i le Peresetene e agatonu lava i lana amio o le faaoolima lea i se tasi o tagata faigaluega o le leoleo po ina ua le usitaia lana tuualalo ina ia tuua le tagofia o le ava i fiafia sa fai a le matagaluega.
“O le fatu atoa lea o le mataupu o feagai nei ma le Palemene o le amio ua faafoliga ua le tautamalii o se alii faamasino ua faaoolima e afua o se fiafia a le matagaluega.”
O le alii Peresitene sa malolo (special leave) mai le masina o Mati i le tausaga e 2018, ma i le mae’a ai o lana mataupu i luma o le Faamasinoga o apili sa fa’amaonia ai lana soligatulafaono ma sala tupe ai i le aofaiga e $7,000.
O le mataupu sa tulai mai i le faaiuga o le tausaga e 2017 i le vaitaimi o fiafia i le faaiuga o le tausaga ina ua fa’aoolima le Peresetene i se tasi o leoleo po a’o faia ai se fiafia a faamasino uma o le matagaluega i totonu o le lotoa.
(7)
