O le fale taavale o le Tuvao taxi stand ua faamaite nei i nisi o atina’e mo le manuia o aiga, e pei ona saunoa iai le pulesili o le fale taavale, le afioga ia Toleafoa Mautofu Romeo Sa i se faatalanoaga ma le Global News.
Saunoa Toleafoa, talu ai ona o loo feagai ai lo tatou atunuu ma vavao, o lea ua iai le fuafuaga e agai loa le latou mafutaga, e tapena mo le saogalemu o aiga, ae maise o nisi itu e mafai ai ona tausia aiga. O le a amata lea i ni asiasiga mo togalaau’aina mo ave taavale uma, a ma’ea togalaauaina, ona see atu lea i lona vaega lona lua, mo le tapenaina o pa poo lafu moa.
“Ua mafua ona faia lea fuafuaga ina ia iai se mea e tua iai aiga, e le mo se manuia a se isi lava ae manuia ai lava le ave taavale ma lona aiga.”
Saunoa Toleafoa, o lea ua tatou iai i tulaga o vavao, ua taofia foi ta’avale laiti ona feoai, ua leai foi ni pasese, ona ua taofia le feoai o le atunuu, e manaomia le faa’aoga tatau o aso o le vavao, e atinae ai le aiga aemaise o le maua ai foi o le faamalositino aua le tausiga o le soifua maloloina.
O le isi vaega o loo faamamafa i ave taavale, o le ave lea o le faamuamua i le saogalemu, “e tapa ai le ave taavale le faailoa muamua o le pepa tui (fully vaccinated card) faapea se tali fofoga, faatoa mafai lea ona ulufale le pasese i totonu o le taavale. Sa saunoa le alii pule e mafua lea tulaga, ina ia iai se sao o le fale taavale, mo le puipuiga lautele faapea le tali atu lea i talosaga mai le Komiti o Faalavelave Faafuasei (NEOC) ae maise le Malo – ina ia tatou galulue faatasi.
O le fale taavale o le Tuvao ua silia ma le lima tausaga lana auaunaga, e 27 taavale la’u pasese o loo resitala ai. O tofiga i luga o le laulau fono, o le susuga ia Taualiipano Nimo o loo avea ma Peresetene, o le susuga ia Pelenato Saena o le Sui Peresitene, ma le Failautusi le susuga ia Jason Ulale.
