E toalua tamaitai sa oo atu i le ofisa o leoleo ma faaulu ni laua tagi e faasaga i le alii faiaoga taiulu ia Mase Mahonri Schwalger.
Sa faamaonia mai e le Komesina o le Matagaluega a Leoleo le afioga ia Auapaau Logoitino Filipo.
O moliaga e pei ona tuuina mai e leoleo o le faia lea o gaioiga tau feusuaiga, moliaga o le faia ni amioga i se isi e iai se sootaga.
O le Aso Tofi 26 Setema sa ave ai e leoleo le alii faiaoga i le ofisa autu i Apia ma faia ai moliaga. Sa mulimuli ane toe tatala i tua i aiaiga (on bail), e aofia ai le taofia lea o lona tusi folau, saini le ogatotonu ma le faaiuga o le vaiaso i le ofisa leoleo i Faleata.
O le Aso 4 Novema e tulai ai i luma o le faamasinoga e tali atu i ona moliaga.
Ua faailoa i se Pepa o Faamatalaga mai le Ofisa autu o le Lakapi Samoa, ua latou silafia moliaga faasaga i le faiaoga ulu.
O loo latou lagolagoina suesuega a le Matagaluega o Leoleo, ma e le mafai foi ona toe tuuina mai se isi faamatalaga ona e manumanu foi i aia tatau a i latou uma o loo aafia ma tuuaia.
E 4 tausaga le konakarate a Mase Mahonri Schwalger e faatoa faama’ea ina ua uma le taamilosaga o le ipu a le lalolagi 2027.
I le taimi na filifilia ai Mase i lona tulaga faiaoga na ia saunoa ai, o le filifilia o se isi e fai ma sui o le atunuu, o se faiaoga poo se tagata taalo, o se tiute ia faatino ma le faamaoni ma le agaaga ia ausia le tulaga maualuga o le ofu lanu Moana (the blue jersey).
Na filifilia Mase e sui tulaga i le afioga ia Vaovasamanaia Seilala Maposua.
O Mahorni Schwalger ua 40 taaloga faitaulia faavalemalo mo le Manu Samoa. Sa ia kapeteniina foi le au a le atunuu i le tausaga 2000 agai le 2011 e aofia ai ma le taamilosaga o le ipu a le lalolagi 2011.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
