Tulai Luma le Faamasinoga Latou e Toavalu na Molia i le Aisa

0
1194

O le aso ananafi 14 Fepuari 2022 na tulai ai i luma o le faamasinoga maualuga i latou sa molia e leoelo ina ua osofaia se fale i Vaitele i le Maali Street lea sa maua ai le 90g o le pauta o le aisa faapea ma ni mea faigaluega (utensils) e faaogaina e ulaina ai le aisa. O nei pauta e pei ona saunoa iai le Afioga ia Auapaau Logoitino Filipo o le Sui Komesina o Leoleo, ua maea ona faapepa, e foliga mai ua sauni e faatau atu.

E toavalu i latou na taofia mai i lea osofaiga i le masina o Novema 2021. Ae o lenei lava fale sa molia mai ai foi se toaono i se osofaiga a leoleo ia Iulai 2021, sa maua ai se tinoitupe e $23,000 afe tala, faapea aupega e le resitaraina ma no pulu faga sei tulou.

O Ilaita Tafili ma Duncan Ah Hi na faamautu mai e le tamaitai faamasino ia Niava Mata Tuatagaloa e toe valaau le la mataupu i le aso 21 o le masina nei, sei faamautu mai le talosaga mai le afioga ia Unasa Iuni Sapolu, mo le tatalaina o i la’ua i tua (bail hearing), ae o le a tumauina pea le taofia i lalo o le vaavaaiga a leoleo mo le taimi nei.

O le susuga ia Mefiposeta Tulua, na teena e le itu a leoleo le tatalaina i tua, e faapea o loo iai foi nisi moliaga o loo molia ai o ia, ae o le a faaauau pea ona taofia i lalo o vaavaaiga a leoleo.

O le alii ia Rodney Chricton, o le a toe valaau lana mataupu i le Aso 21 o le masina nei, ona e lei avanoa mai le loia ia Afa Lesa mo faamautuina o se talosaga e tatalaina ai o ia i tua.

O Nicky Ah Kuoi, ua tuuina atu iai e le faamasinoga le avanoa e saili ai sana loia.

E iai ma se au uso tamaitai e suafa ia Veronika ma Sahar Toleafoa, lea la sa mafai ona tatala i tua, i lalo o aiaiga nei:

* Tapu ona toe fesootai atu ma se isi o i latou na molia faatasi mai laua.

* Tau’aao mai pepa malaga poo tusifolau i le resitala.

* Ia nonofo i Solosolo, ma aua nei toe vaaia i Vaitele.

* Saini i le ofisa o leoleo i Apia i le aso Gafua ma le aso Faraile ae le’i taina le 12 i le aoauli.

* Faasaina foi ona toe latalata i le vaeaga lea o le Maali Street lea na molia mai ai latou.

E aofia ai la ma Gafa Siona lea na tatala i tua i le Aso Faraile ua tea atu nei, ina ua talia e le faamasinoga maualuga le talosaga a lana loia ia Muriel Lui.

O le a valaauina i luma o le faamasinoga maualuga latou mataupu i Ie masina o Iuni o le tausaga nei.