O le sa avea ma pule o se tasi o lala a le Bluebird Lumber & Hardware i Vaitele, faapea ma nisi o sui sinia o le auauanaga, sa tula’i uma i luma o le Faamasinoga Maualuga i le vaiaso nei.
O Rupesh Kumar Singh, Milovale Maualalo, Solomona Taupi Iva, Talele Anuilagi ma Gatasi Poamo – sa tula’i i luma o le Faamasinoga Maualuga e tali atu i moliaga o le gaoi ao faia ma tagata faigaluega.
I faamaumauga a le itu a leoleo e pei ona fofolaina e le ofisa o le Loia Sili (prosecuter) e 58 moliaga o le gaoi ao avea ma tagata faigaluega.
E $248,511.56 le aofai o le seleni o loo tuuaia ai i latou nei mai moliaga e 58.
I taualumaga o le Faamasinoga na talosaga ai le itu a leoleo mo se taimi faaopoopo, sei toe faamautu ai moliaga.
Na talia e le afioga ia Fepuleai Ameperosa Roma le talosaga, ma tolopo ai lenei mataupu mo le isi lua vaiaso e toe fofogaina ai.
E le’i iai ni loia a nisi o loo molia, ma sa faapea mai fo’i le Faamasinoga, o se avanoa foi lea e tuuina atu e sailia ai ni a latou loia.
O loo tatala i latou uma nei i tua i aiaiga o le taofia o latou pepa malaga, saini i le ofisa o leoleo i Aso Lulu ma Aso Faraile o vaiaso taitasi.
Na molimauina le auai atu o nisi o le aufaigaluega a le kamupani Bluebird Lumber & Hardware i le fale faamasino i Mulinuu ina ua fofogaina lenei mataupu.
Sa tā’ua e se tasi o sui faamoemoeina o le kamupani, e faitau miliona le aofai o oloa o loo masalomia na aveeseina faagaoi e i latou uma nei, ae maise, o loo auai ai ma le Initia sa tuu iai le faamoemoe e pulea le isi lala o le kamupani i Fugalei.
Faasalalauga Taua




- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025














