Faa-Samoa

Tulai i luma o le Faamasinoga se Tasi o Alii na Taofia mai i le Osofaiga i Puipaa

October 3, 2023

1762

Sa tulai i luma o le Faamasinoga Maualuga se tasi o alii sa taofia mai i le osofaiga i Puipaa, mo se soligatulafono sa molia ai i le tausaga 2021.

E ono masina i Tanumalala ua faasala ai e le Faamasinoga Maualuga Faatau Uepa, 52 tausaga, i lona uumiaina o le 0.3 kalama o le fualaau faasaina o le aisa, faapea ma se paipa sa maua faatasi ai.

O Faatau Uepa, o se tasi lea o alii e toasefulu sa taofia mai i le osofaiga a leoleo i le Aso 19 o Setema 2023 i Puipaa, lea sa maua ai le $23,000 tala ma oloa e silia mai le $50,000 le tau aofai.

$50,000 worth of goods seized by Samoa Police from Puipaa raid. Photos: Samoa Police.

Ina ua taofia mai nei alii e toasefulu ma se tamaitai e toatasi, sa saunoa le Sui Komesina o Leoleo, Papalii Monalisa Tiai-Keti, o loo iai nisi o i latou nei, na molia muamua ma faasalaina i le falepuipui i moliaga lava nei e aafia ai le fualaau faasaina o le aisa.

O Faatau Uepa, e maua atu i le osofaiga i Puipaa, ae o loo tatala i tua i aiaiga (probation) e tālia ai se isi foi mataupu na molia ai i le tausaga 2021 – lea sa lauina mai i le Aso Gafua.

I le uumia ai o le 0.3 kalama o le aisa, na amata le fua a le Faamasinoga I le 12 masina. E pei o faiga masani a le tulafono, sa toesea isi masina ona o nisi o itu lelei na faailoa i luma o le Faamasinoga.

Na taumafai atu le tamaitai loia ia Unasa Iuni Sapolu, i lana talosaga mo le tolu masina e amata mai ai le fua a le Faamasinoga peitai e le’i talia a le afioga i le Faamasino ia Niava Mata Tuatagaloa.

E ono masina e faasala ai Faatau Uepa i lona uumia o le aisa, ae fa vaiaso e faasala ai i le uumiaina o se paipa e fa’aaoga e ula ai le aisa.