Tufaina atu Faailoilo Laupapa Fou mo Nuu uma o Samoa

0
257

Tusia: Taunuuga Toatasi, Ofisa o Sooupu, Malo o Samoa.  O le mautū ma le lelei o fa’ailoilo laupapa e tusi ai igoa o nu’u ta’itasi, e matuā faigofie lenā mo so’o se tasi e malaga mai ma ta’amilo i totonu o motu ta’itasi o Samoa.

Ae silisili ai ona faigofie mo turisi e afea o tatou laufanua mo tafaoga ma mālōlōga.

O le tāua sili lenā o le toe fausiaina o fa’ailoilo laupapa fou, ua tapenaina e le Pulega o Tagata Tafafao Maimoa mai Fafo (STA) ma ana Pa’aga – ina ia iloa gofie ai nuu taitasi.

Ua maua nei i le SOS Togafuafua ma Salelologa.

E taua foi mo le faamatagofieina o Samoa aemaise le aga’i atu i lana taligāmālō tele i le Fono a Ta’ita’i o Mālō o le Taupulega i le fa’ai’uga o lenei tausaga 2024.

O le tāina ma le lolomiina o igoa i nei laupapa fa’ailoilo, sa gafa lea ma le Kamupanī a le Signs Studio Ltd. Sa fa’atupeina lea polōketi tele i le agalelei mai o le Mālō o Niu Sila i lona tau aofa’i e $320,788.19.

O se itu lelei, e fa’aitiitia ai le fesēa’i o tagata i le tau sā’ilia o nu’u o lo’o fia aga’i iu i ai, a’o se itu atili teuteu ai le aulelei ma le matagofie o si o tatou atunu’u a’o feagai ai ma turisi asiasi mai i lea taimi i lea taimi.

I le fa’apa’iaina ma le tatala aloā’ia ai o lea polōketi tāua, na talatala manino ai e le Ta’ita’ifono o le Komiti Fa’atonu o le STA iā Tau’ili’ili Alise Stunnenberg le āoga o ia fa’ailoilo laupapa mo nu’u ta’itasi.

“O le ‘auga ma le fa’amoemoe o lenei galuega, ina ia fa’ailoa igoa o lea nu’u ma lea afio’aga mo le silafia e tagata tafafao maimoa mai fafo.

“E to’atele i latou e malaga mai fafo ma aga’i i nu’u i tua, a’o le fa’afitauli e leai ni fa’ailoilo e iloa ai po’o fea lea nu’u, a’o ai lea nu’u, ua solo atoa i le va’ai ona ua leai ni fa’ailoilo o toe tutū ai.

“O le naunauta’iga lava o tatou Samoa, ina ia toe taliu turisi sa asiasi mai ma afea o tatou laufanua, ma avatu le tala lelei, i le tulaga ‘ese o le matagofie o Samoa i afio’aga ta’itasi, aemaise o le i ai o fa’ailoilo e iloa lelei ai lea nu’u ma lea nu’u.

“E le gata i lea, a’o le tele o afio’aga, e i ai a latou mata’aga mai tala fa’asolopito o aso anamua, e tuliloaina fo’i e turisi asiasi mai, o se itu lelei lea o le i ai o fa’ailoilo laupapa nei, mo afio’aga ta’itasi.

“O se taumafaiga ua leva ona fa’agasolo, ae fa’afetai i le Atua ua taunu’u le fa’amoemoe e pei ona i ai lenei asō.

“Fa’afetai i le Mālō o Niu Sila, ona o le tu’u mai o lo latou tau’au i le taumafaiga a le STA mo le atina’e atili o lenei ālamanuia mo Samoa.”

Click here to order Delicious Cakes online for your family in Samoa!

Saunoa le Ofisa Sili o Pulega o le STA iā Toleafoa Pativaine Petaia Tevita e fa’apea;

“O le a fa’asopolia uma Upolu ma Savai’i i lea polōketi, ma o se taimi o i luma ona o’o atu lea i Manono ma Apolima.”

O le tu’uālalo a le Mālō tauala mai i le Pulega o Tagata Tafafao Maimoa mai Fafo mo Samoa aoao, ina ia tautuanā, galulue fa’atasi e fa’atumauina le lelei ma umi ona āoga ia fa’ailoilo laupapa i le lumana’i.

Auā o aseta a le Mālō, o aseta e pulea ma va’aia e tagata uma, auā o meatotino a Samoa atoa, e ao ai ona tatou fa’atumauina le lelei ma puipuia mai le fa’aleagaina.

O le naunauta’iga o le S.T.A. ina ia ta’imua le Pulega Mamalu a Ali’i ma Faipule o Afio’aga ta’itasi, e mata’itūina i latou ē amio lē pulea, o lo’o fai pea a latou mausa, le fa’aleagaina o nei meatotino āoga.

Faasalalauga Tāua 

Avanoa Faigaluega – SSAB 

Avanoa Faigaluega – UTOS

Avanoa Faigaluega – SPA
Job Opportunities
Job Opportunities