Tufa Tupe Faasili e .08 sene i le Iunite mo Aufai’iunite a le UTOS

7 Iulai 2021, Faamatalaga Faalauaitele.

Fa’alauiloa e le Fa’aputugātupe Teufa’afaigaluega o Mavaega Tausi a Samoa (UTOS) le tufatufaga o tupe fa’asili e .08sene i le iunite mo ana aufai’iunite, mo le tausaga fa’a-le-tupe fa’aiuina 30 Iuni 2021.

E le tau fesiligia le faigata sa iai le tausaga fa’aletupe lea ua maea i le aso 30 Iuni 2021, ona o a’afiaga o le fa’amai o le Koviti-19, ua afaina tele ai le tamāoaiga o le lalolagi, ma e talitonu foi, ua telē foi se afaina ai o le tatou tamāoaiga.

E ui i nei a’afiaga o le tamāoaiga, a’e o lo’o fa’aauau pea ona taumafai malosi le Fa’aputugātupe (UTOS), e fetu’unai le fa’atinoga o ana galeuga, ona o nei a’afiaga, ina ia maua se tufatufaga talafegai mo ana aufaiiunite.

O se fiafiaga tele e fa’alauiloa atu ai, e pei ona fa’amaonia ai e le Komiti o Fa’atonu a le Kamupani o Pulega a le Fa’aputugātupe Teufa’afaigaluega o Mavaega Tausi (UTOS) a Samoa, lana tufatufaga o tupe fa’asili e .08sene i le iunite, ma o le pinefa’amau lea, o le naunautaiga faifai pea a le Fa’aputugātupe, mo se manuia o ana aufaiiunite.

O le tufatufaga o tupe fa’asili e .08 sene i le iunite ua ausia, ona o le 11.70% ua mafai ona toe maua mai i luga o tupe sa fa’agalueina e le Fa’aputugātupe, i totonu o lenei tausaga fa’aletupe. E $6.6 miliona tala le vaegatupe atoa o le ā mafai ona tufatufaina atu i aufai’iunite.

E le gata i lea tufatufaga, ae ua fa’amanuiaina fo’i le aufai’iunite i le 6.02% o le si’itaga i le tau aogā o le iunite talu le amataga mai o le tausaga fa’aletupe iā Iulai 2020.

O le atoaga o tupe fa’asili na maua mai i luga o tupe sa fa’agalueina e le Fa’aputugātupe i lena tausaga fa’aletupe e 11.70%, ma e maualuga atu nai lo le 10.21% sa fa’amauina i le tausaga fa’a-le-tupe muamua atu. O lenei taunu’uga e atagia ai le naunautai pea o le Fa’aputugātupe, e si’itia tupe maua mo ana aufai’inute i tausaga taitasi.

Maketi i Salelologa, Savaii o loo iai le Ofisa i le faigapaaga ma le GCA.

O lenei tufatufaga o tupe fa’asili sa fa’alauiloa e le Komiti o Faatonu i lana fonotaga fa’a-lē-masina na usuia i le aso 30 o Iuni 2021. Na tapunia le fefa’atauaiga o iunite ina ua maea ona fa’alauiloa lenei tufatufaga, ina ia fa’atumau ai pea le fa’atuatuaina o auala o fefa’atauaiga o iunite, ma galulue le aufaigaluega e fa’amautu fuafuaga uma mo le tufatufaga o lenei tupe fa’asili. O le aso Gafua, 12 Iulai 2021 e amata agava’a ai le aufaiiunite ona fai a latou filifiliga, pe tala i tua (tala atoa pe na o se vaega) pe toe teufa’afaigaluega a latou tufatufaga.

Mai le aso 30 o Iuni 2021 ua fa’amauina ai le o’o atu i 3,841 le aofa’i atoa o le aufai’iunite a le UTOS, ma o se si’itaga e 16% i le fuainumera o tagata ua fa’afaigaluega a latou seleni i le UTOS, talu mai le tausaga fa’a-le-tupe 2019/2020.

Na fa’aalia e le Ofisa Sili o Pulega a le Kamupani o Pulega, Tevaga Viane Tagiilima lona agaga fa’afetai i le lagolago malosi mai a ana aufai’iunite ma pa’aga masani i lenei vaitaimi faigata male tele o luitau, a’e o le tou talitonuina o auaunaga tau tupe a le UTOS, ua mafai ai ona toe ausia se isi tausaga fa’aletupe manuia. E fai ai ma sui o le Tausi Mavaega, le Taitaifono ma le Komiti o Fa’atonu, e momoli atu ai e le Pulega ma le aufaigaluega a le Kamupani o Pulega a le Fa’aputugātupe Teufa’afaigaluega o Mavaega tausi a Samoa le fa’amālo ma le fa’afetai tele i tagata Samoa uma o lo’o aumau i Samoa nei ma atunu’u mamao; o lo’o fa’aauau pea ona teufa’afaigaluega a latou seleni i le Fa’aputugātupe Teufa’afaigaluega o Mavaega Tausi a Samoa.

O le Fa’aputugātupe Teufa’afaigaluega o Mavaega Tausi a Samoa o se Fa’aputugātupe tumaoti e pulea e aufai’iunite ua tu’uina atu le fa’atuatuaga i se kamupani tau Mavaega Tausi, na te va’ai ma tausia uma ana aseta. O nei vaegātupe e teufa’afaigaluega ni auala ese’ese e maua mai ai ni seleni fa’aaopo’opo, e pei o Tupe teu fa’avaitaimi i faletupe, nonōgatupe a le Malo o Samoa ma sea i totonu o kamupani tumaoti. O lana anava fa’aagafeso’otai a le Fa’aputugātupe (UTOS), o le aofia ai lea o tagata uma; o le saunia lea o ni auala faigofie ma taugofie e teufa’afaigaluega ai seleni a so’o se tagatanu’u Samoa. O lana anava fa’apisinisi, ina ia ausia ni tupe maua fa’asili talafeagai mo ana aufai’iunite.

O le kalafa o lo’o i lalo, o lo’o fa’ailoa atu ai taunu’uga o galuega fa’atino a le Fa’aputugātupe (i pasene tupe maua fa’asili mo le aufaiiunite) i totonu o tausaga fa’a-le-tupe e lima ua maea.