Tufa ia Ianuari le Tului 2.4% mo Faisaofaga a le NPF

0
1288

O le a talaina i tua se tului 2.4% mo faisaofaga a le NPF ia Ianuari e fetaui lelei ma tapenaga o le a’e o aoga a le fanau.

Sa faailoa mai le tului mo Ianuari e le Minisita o Tupe le afioga iā Lautimuia Uelese Afoa Vaai, i le tauaofiga mulimuli o le Palemene o Samoa i lenei tausaga, faapea ma se faatalanoaga na auai ai le Taitaifono a le NPF, le afioga iā Papalii Panoa Tavita Moala.

Saunoa Lautimuia, “O lenei tului o le a faatoa mafai ona tala i tua i le masina o Ianuari o le tausaga fou, 2024.”

E $24,076.668 tala ua faailoa mai e le Minisita ma le Taitaifono, o le a fa’aalu mo le totogiina atu o tului mo saofaga.

O nei tului (dividends) e tuuina mo sui faisaofaga uma lava, tusa lava poo iai ni tulaga faaletonu o le totogiina i sau loan sa fai le NPF. E agavaa lava soo se isi.

Saunoa Papalii Panoa, “E lua masina e faamatuu atu ai lea faamanuiaga mo le atunuu, a uma le lua masina e lei talaina i tua lau cash pay-out lona uiga o le a alu sa’o loa lau contribution i lau saofaga.”

“O le faatinoina masani e resitala ai online ae te lē tau sau susū mai i le tatou ofisa.”

“O aiaiga afai ei luga atu lau faamanuiaga ma le $50 tala, e te agavaa mo le talaina i tua, ae afai e i lalo mai o le $50 tala lau faamanuiaga e fua i lau saofaga, lona uiga o le a alu sao loa i totonu o lau saofaga.”

Ae saunoa Lautimuia, e masani ona maua faamanuiaga nei i le ma’ea ai o tausaga faaletupe i le masina o Iulai, peitai, ua manatu le Malo e tuuina atu se fesoasoani ma se faamama avega mo le atunuu aemaise o taimi o tapenaga mo le toe foi o fanau i le aoga.

“E tāua ai foi le totogi o lau saofaga e te fiafia ai i se seleselega i le taimi mulimuli.”

O se itu o loo faatalitali iai le toatele le atunuu mo le faaiuga o lenei tausaga peitai, ua talafeuga lelei le polokalame ua folasia e le Malo mo le toe foi o fanau aoga mo le tausaga fou.”

O le fonotaga a le Palemene i lenei vaiaso sa folasia ai le tala faatatau faaopopo o le tupe mo le 2022/2023 lea sa faailoa ai e le Minisita le siitia o le tamaoaiga o le atunuu i le 8% poo le $2.55 piliona.