“Tou te ō nei lava ma ave le tou miliona, e lē o ni upu e avane ai..”
O le saunoaga lea a le Taitaifono o le Faatuatua i Le Atua Samoa ua Tasi, le afioga Laaulialemalietoa Leauatea Polataivao Fosi Schmidt, i le feiloaiga ma le itumalo o Vaa-o-Fonoti ina ua masii atu e momoli le afioga Mau’u Siaosi Puepuemai, e tauva i lalo o le tagavai a le Fast mo le palota laititi o loma nei.
E toatolu sui sa faamavae mai le HRPP lea ua sauni e toe fo’i e fesiligia se finagalo o latou itumalo e ala i palota laiti. O le Aso Faraile sa momoli aloaia ai Mau’u Siaosi, ao le Aso Toanai na momoli ai Tu’uu Anasii Leota ma Ale Vena Ale e la’ua foi itumalo o Siumu ma Faleata 4.
Saunoa Laauli ina ua faafesagai ma le itumalo o Vaa-o-Fonoti, e lē fou le feiloaiga a le Itumalo ma le vaega faaupufai o le FAST.
“Sa tatou nutimea faatasi ma nisi o tamaalii o le itumalo, a’o tau osiosi le resitalaina o le vaega faaupufai lenei a’o loma le palota tele..”
“Peitai o le taeao lenei e fou mea uma, i le tou afifio mai ma tala mai aao e momoli mai lē ua tasi ai le tōfa a le Itumalo..”
“E fai a’u ma sui o le tatou aiga.. matou te talia ma le fiafia le afioga Ma’uu Siaosi Puepuemai.”
O le tootoo a le itumalo, le tofa Ifopo Aumua Lio, na fetalai e faaleo le finagalo o le itumalo i le momoliina o le afioga Ma’uu.
Sa saunoa manino foi Ifopo i nisi o manaoga a le itumalo, aemaise o le tagisa lea o le faaleleia o latou auala o loo faaleagaina, faapea le faasololia o le auala i Sauano ma Salesatele, atoa ai ma se vaega o le miliona o loo totoe nei.
Sa tali le taitaifono, “Ua fetalai foi le tootoo i le asō, ia aua e te popole. Ae lafo mai ou te iloa o lea e lē o iinei le Minisitā o Galuega Tetele ae taoto mai lou fanoga, na o le Minisita o Soifua Maloloina, sei fai le tatou falemai lea ua leiloa poo fea ua oo iai..
“O le Minisita o Turisi, e tau faasoosoo auala ia na saunoa mai .
“O le Minisita o le Miliona.. ia tou te ō nei lava ma ave le tou miliona, e le o ni upu a e avane ai o upu a e tautino…”
Na faailoa le agaaga fiafia i le patipati o le mamalu na aofia i lea saunoaga a le Taitaifono.
O le maea ai o lenei faamoemoe na ta’ape ai e aunoa ma ni faa’aloaloga e pei ona masani ai le aganuu, ona sa manumanu nei toe vaemanua le faamoemoe ona o Tulafono o Faigapalota, e pei ona saunoa iai Laauli i lena aso.
“E iai le taimi e iai le aso tatou te toe fesilafai ai faapenei, ma momoli aloaia mai le tatou Faipule faaauau auā ona tofiga auā le faalagamaea a Samoa..
“Pau a lau tatalo Mau’u, o le mea na feagai ma matou ma Lautimuia, uma le faigapalota, ae ae toe fai i le faamasinoga…”
“Ua tatou vaavaai nei ua maai mata o le tulafono.. ua vaavaai vale foi le fili aua o se sene apa e te toe avea i le asō, o lou lē alofa lena ia te oe ma le tatou itumalo..”
Saunoa faaiu Laauli e timai ai i le itumalo, ina ia sao le tapenaga a Mau’u i ala uma o le tulafono.
