Tusia: Pesetā Tusiga Taofiga 17 Oketopa 2025. O lo’o manuia mea uma, i le si’igā gasegase a le afioga i le Palemia iā La’aulialemalietoa Polāta’ivao Leuatea Schmidt. O le saunoaga manino lea mai le afioga i le Sui Palemia iā Toelupe Maoiautele Poumulinuku Onesemo i le feiloā’iga ma Tusitala i le asō.
Saunoa le Sui Palemia, o le ta’otoga i lona ‘ā’ao [vae], o lo’o mo’omia ai le lava o lana malologa, ma e lē o mafai fo’i ona tu pe savali i le taimi nei, ona o fa’aeteetega i toe a’afia lona ‘ā’ao.
Na ia fa’ailoa fo’i, o le fautuaga mai foma’i o lo’o latou feagai ma togafitiga o le afioga i le Palemia i Niu Sila, e lē talafeagai mo le taimi nei, ona malaga mai i Samoa La’aulialemalietoa, ona e tāua le i ai pea i Aotearoa auā siaki fa’afoma’i i taimi uma.
O le isi itu tāua, ia lava lelei lana malologa, ina ia pe lelei manu’a o lona ta’otoga a’o le’i toe taliu mai i Samoa mo le fa’aauauina o ona tiute fa’alemālō.
Fa’ailoa e Toelupe, e feiloa’i lava ma La’aulialemalietoa i aso ta’itasi i feso’otā’iga i le telefoni ma auala tekonolosi fa’aneionapo, ma e leai se tulaga e fa’apopoleina ai le atunu’u, o lo’o manuia lava o ia, o lo’o fa’asolosolo manuia fo’i lona fa’atafa gasegase.
O le fa’ai’uga o le vaiaso nei, na fuafua e toe taliu mai ai i fanua, peita’i ua fa’ai’ugāfonoina e le Kapeneta e tusa ma fautuaga a foma’i, ua fa’aauauina ai ona talimau pea le Ta’ita’i o le Mālō i Niu Sila, e sa’ili malosi ai, se’ia fa’afo’isia lelei lona gasegase.
Na fa’afetaia fa’apitoa e le Mālō tauala atu i le afioga i le Sui Palemia, le atunu’u atoa i ona tulaga fa’alupe, i le nofo tatalo ma le tapuā’ia pea o le si’igāma’i a le afioga i le Ta’ita’i o le Mālō.
“E lagona lava le mafanafana o le loto, ma maua ai pea le fa’asiligā malosi i le afioga i le Palemia, ona o ā outou talosaga leoleoa a’o feagai ai o ia ma fa’atafa gasegase. Fa’afetai le manatu i lo tatou Ta’ita’i, fa’afetai le tatalo.”
O le fuafuaga o lo’o i ai, a fa’asolosolo manuia le si’igāma’i a le afioga i le Palemia fua i fautuaga mai susuga i Foma’i, o le ā toe taliu i fanua i le amataga o le masina fou [Novema].
Ata Pu’eina: Pesetā Tusiga Taofiga.
Public Notices
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
