I le fa’ato’a mae’a o se fonotaga a le Afioga i le Alii Palemia, Susuga Tuilaepa Sailele Malielegaoi ma le ‘au fa’asalalau i le afiafi nei, sa ia aumai ai se fa’amalosiau mo tagata uma o le atunu’u e tautuana, ina ia nofo tatalo ma aua le atuatuvale i lenei vaitau o le le mautonu.
Sa fa’aalia e Tuilaepa o lea ua mae’a le fonotaga a le Kapeneta ma ua iugafonoina o le a tolopoina le faigamalaga mai Amerika e pei ona fuafuaina mo le Aso Faraile nei.
O le fa’amalosi a le ta’ita’i o le atunu’u; ina ia aua ne’i atuatuvale ma ia nofo tatalo pea le atunuu, atonu e o’o atu ia Tesema ua ‘ese foi se ata e va’aia; ma toe fuafua ai loa se aso mo lenei faigamalaga.
Mo le taimi nei, sa fa’amalulu mai le Afioga i le Alii Palemia i tagata uma ua mae’a ona tapena mai mo lenei faigamalaga e onosai pea, ma nofo Tatalo, e fai aso Le Alii.
“Pau le mea o le tatalo pea i le Atua ia maua se tali vave o lenei mafatiaga ua feagai ma le atunu’u faapea le lalolagi atoa. O se itu tāua lena o se fa’amafanafanaga loto mo i tatou uma,” o le saunoaga lea a le Afioga i le Palemia.
Sa tā’ua e Tuilaepa le savalivali atu o le Afioga i le Ta’ita’ifono ma le Sui Ta’ita’ifono o Ekalesia So’ofa’atasi i Samoa, ma se la’ua tu’ualalo e uiga i lenei faigamalaga.
“E momoli le fa’afetai i Fono a Ekalesia So’ofa’atasi, le Ta’ita’ifono ma le Sui Ta’ita’ifono ma sui o Ekalesia na savalivali mai ma matou feiloa’i, ua le manofonofo se latou tu’ualalo, ma e taua tele i le malo fautuaga ua fa’ao’o mai.”
Saunoa Tuilaepa o le mafua’aga lea o le faia o le fa’ai’u’ga a le Kapeneta ina ia toe tolopo lenei faigamalaga mai Amerika, nei se’ia iai se aso lelei.
Saunoa le Afioga i le Alii Palemia, e leiloa pe o’o atu i le masina fou o Tesema ua va’ai ata o ta’uleleia ona toe fetu’una’i lea o se aso lelei mo lenei faigamalaga e pei ona fuafuaina.
Sa tā’ua foi e le Alii Palemia, o lea ua oo mai lava tala i tui eseese mo le lenei faama’i.
“O se tulaga fa’afiafia loto, o le tau mai ā i le aoauli o le asō, o loo fa’atalanoa lava fa’atatau i le fa’aaogaina o tui;
“Lea foi e ta’u mai ai le tau ma ta’u mai ai pe ā ma le tolu ituaiga tui eseese lea ua fa’aalia mai le aoga tele mo togafitiga;
“Pau o lona e le’i iai a se iuga mo le mafai loa ona fa’aaoga fa’alauaitele i atunu’u i fafo atu o atunu’u lea ua latou fa’aaogaina.”
O se tali mai lea a le Palemia i lana saunoaga faamalosi’au lea mo tagata o le atunu’u, aemaise o nai tagatanuu ua lē mafai ona malaga mai i le Aso Faraile nei.
O le malaga lea e pei ona silafia e le atunu’u na saunoa Tuilaepa na togipau e le Malo ona o le naunauta’iga ia mafai ona aumai i le atunu’u nai fanau a’oga aemaise o aliiva’a ma nai tagata ua loa ona fa’aaunu’ua i Amerika, peita’i, e lē o tilotilo le Malo i nā tupe ua ma’umau, aua o mea lava e tutupu, ae faasilisili le tagai a le Malo i fautuaga ma tu’ualalo e pei ona avatu e ta’ita’i o Ekalesia.
Mo le silafia, o loo faaauau pea faigamalaga e lua mai Niu Sila, lea e taunuu mai e lei oo i le Kerisimasi.
(1)
