O lea aso ananafi sa talia ai se faaiuga a le faamasinoga i le alii o Taualai Leiloa Tuilaepa, lea ua ia ioeina moliaga e lua o le taupulepule e tagatavaleina le Alii Palemia o Samoa, peitai ane na toe tolopo le faaiuga a le faamasinoga, ma faatonuina ai le alii o Taualai e saili sana loia e tulai mo ia.
O le saunoaga a le Alii Famasino Sili ia Vui Clarance Nelson e faapea talu ai e iai vaega o le tulafono e ono aafia ai pe afai e leai se loia a Taulai e tulai mo ia ma e fai si ogaoga tele o le moliaga o loo molia ai lea alii, ma o tulaga ia e lē o silafiaina e Taualai.
Sa fesiligia foi e le Alii Faamasino pe gafatia ona totogi se loia, peitai sa faapea atu Taualai e leai. O lea la ua tolopo atu ai nei i le aso muamua o Novema o le tausaga nei seia maua se loia a lea alii.
O le isi aualii e toalua o loo molia faatasi ma Taualai i moliaga nei o loo taofia ai nei e leoleo, o Malele Paulo ma Lema’i Faioso Sione o le a tutulai i le Aso Lulu o le vaiaso fou, e faafofoga a la loia i nisi o mataupu tau tulafono e aafia ai le mataupu o loo tutulai ai i laua ia.
O le alii o Taualai o loo tatala ai nei i tua. Ae o loo tālia pea se aso e faafofoga ai i talosaga e tatala ai i tua Malele Paulo ma Lemai Faioso Sione.
(1)
