Ua tofiaina nisi sa tauva i le faigapalota tele e fai ma sui o Komiti Faatonu mo Faalapotopotoga ma Matagaluega a le Malo.
I se faatalanoaga ma le afioga i le Minisita o Faamasinoga, Hon Matamua Seumanu Vasati Pulufana Sili sa ia faamaoniaina ai nisi o tofiga fou mo Komiti Faatonu o loo faafoeina Matagaluega a le Malo – State Owned Enterprises.
E toatolu i latou sa tauva mo le Faatuatua i Le Atua Samoa ua Tasi i le faigapalota tele, e aofia ai le afioga ia Sala Vaimili II, Papalii Panoa Tavita Moala ma Fata Ryan Schuster.
O Sala Vaimili II lea ua filifilia e avea ma sui o le Komiti Faatonu o le Pulega o le Uafu – Samoa Ports Authority.
O le afioga ia Sala Vaimili sa avea ma Minisita o le Soifua Maloloina (MOH) i le tausaga 1991 – 1996. Sa ia tauvaina le faigapalota tele mo Sagaga 3, lea sa manumalo ai Sala Fata Pinati.
O le afioga ia Papalii Panoa Tavita Moala, ua filifilia nei e avea ma sui auai o le Komiti Faatonu o le NPF – Faalapotopotoga Faaputugatupe Lumanai Manuia o Samoa.
O le afioga ia Papalii Panoa sa ia pulea le NPF i tausaga ua mavae. Sa ia tauvaina le faigapalota tele 2021 i le itumalo o Sagaga I, peitai, sa tulai mai ai le afioga ia Loau Solamalemalo Keneti Sio.
O le tofa ia Fata Ryan Schuster, ua filifilia nei e avea ma sui o le Komiti Faatonu o le Pulega o Ta’aloga ma Malae Ta’alo – Samoa Sports Facilities Authority.
O le susuga ia Fata Ryan, o se faipisinisi iloga i totonu o Samoa. Sa galue o se Taitai Malaga mo le Manu Samoa i tausaga ua mavae. Sa ia tauva i le faigapalota tele mo le itumalo o Sagaga II poo Sagaga le Usoga, lea o loo tulai mai ai le tofa ia Maulolo Tavita Amosa.
O le isi tofiga mo sui auai o Komiti Faafoe e tusa ma le saunoaga a Matamua, o le afioga lea ia Leota Kapeneta Perelini, ua filifilia nei e fai ma sui auai o le Komiti Faatonu a le Matagaluega o Felauaiga i Luga Alatetele – LTA. O Leota sa ia umia le Sui Ofisa Sili (ACEO) i le Matagaluega a le LTA i tausaga ua mavae.
E toatolu ni Komiti Faatonu ua suia nei o latou Taitaifono. O le afioga ia Matafeo Geogre Latu, o le loia sinia o le Sosaiete Loia o Samoa, sa galue o se sui auai o le komiti faafoe a le SLC, Faalapotopotoga Eleele o Samoa (SLC), peitai o lea ua avea nei o ia ma Taitaifono. O le filifilia ai o Matafeo i lea tofiga ua sui tulaga i le tofa ia Lavea Tupuola Malifa sa tauaveina le tofiga Taitaifono.
O le tofa ia Lilo Lilo Leilua Punivalu o se sui o le Komiti Faafoe o Felauaiga i Ala Tetele (LTA) lea ua filifilia ma faamaonia e le kapeneta le tofia lea e avea ma Taitaifono e sui tulaga i le tofa ia Taua Paul Phillips.
O le afioga ia Tauiliili Alise Faulalo Stunnerberg, o se sui auai foi o le Komiti Faafoe o le Pulega Tagata Tafafao mai Fafo (STA) lea ua faamaonia le kapeneta le avea ma Taitaifono.
O le Matagaluega o le MPE e gafa ma le faasalalauina o sui o Komiti Faatonu ma o i latou foi sa iloiloina tusi apalai. E lei tali mai le afioga i le Pule Sili – Tooala Elita Tooala i ni fesili sa tuuina atu iai.
(0)
