Ua fa’amaonia e le Kapeneta, e tusa ma le fautuaga a le Komiti sa nafa ma le iloiloina o lenei avanoa, le tofia ai o le afioga iā Tuitoga Christina Angela Te’o Faitele e avea ma Tausi Mavaega mo le Ofisa o Tausi Mavaega a Samoa mo le tolu tausaga.
O Tuitoga, o se tamāli’i ua iloga lana tautua i lenei Ofisa, ua fa’amauina e 15 tausaga o galue i lea auaunaga a le Mālō, ma ua telē lona silafia i tiute tau’ave ma le fa’atinoga o galuega a le Ofisa o Tausi Mavaega.
E tofia nei Tuitoga, o loo avea o ia ma Loia Sinia Autu a le Ofisa o le Loia Sili.
O Tuitoga o se tamalii mai i le afioga o Faleapuna ma Leufisa ma sa aoaoina i le Iunivesite Aoao o le Pasefika i Fiti. O loo ia umia ni faailoga maualuluga e aofia ai ma le faailoga Loia.
O le tofiga o Tuitoga, ua sui tulaga ai i le afioga iā Leaupepe Peleseuma Mata’utia F.S. Ropati, sa tau’avea lenei tofiga mo le 18 tausaga.
Ua 44 tausaga o le soifua o Tuitoga.
(109)
