TOFIA ALOĀ’IA E LE KAPENETA IA AFAMASAGA TAIMALIETANE MATATUMUA MA OFISA SILI O PULEGA O LE MATĀGALUEGA O FA’ATO’AGA MA FAIGĀFAIVA [M.A.F.]
[SO’O’UPU A LE MĀLŌ]: Ua fa’amaonia e le Kapeneta le tofia aloā’ia o le afioga iā Afamasaga Taimalietane Matatumua e avea ma Ofisa Sili o Pulega mo le Matāgaluega o Fa’ato’aga ma Faigāfaiva [M.A.F.] mo le umi e tolu tausaga.
O se tamāli’i ua loa tausaga o lana tautua i le auaunaga tau fa’ato’aga ma faigāfaiva e pei ona galue ai i totonu o le Matāgaluega i le silia i le 20 tausaga.
Na amata tautua Afamasaga i le Matāgaluega i le 2003 o se Ofisa Sinia, a’o le’i se’e atu ma fa’aauau ai lana auaunaga i le tulaga fa’apulega i le 2018 se’ia o’o mai i le taimi nei.
O lo’o ia umia Fa’ailoga Tauāloa i le Tipiloma Mauāluga i Fa’ato’aga, o le Tikerī tau Fa’ato’aga ma le Tipiloma tau Fa’ato’aga mai le Iunivesite o le Pasefika i Saute [U.S.P.].
