Tofia e le Komiti o le Palemene le Taitai o le Itu Agai

I le fonotaga mulimuli a le Palemene o Samoa i le vaiaso nei, na faamaonia ai se lipoti a le Taitaifono le susuga ia Auapaau Mulipola Aloitafua, o ia foi o le Sui Fofoga Fetalai, le tofiaina lea o le afioga ia Fonotoe Nuafesili Pierre Lauofo Meredith, e avea ma taitai o le Itu Agai.

O lea tofiga e sui tulaga ai Lauofo i lē sa avea ma Palemia o Samoa mo le silia i le 20 tausaga, le susuga ia Tuilaepa Sailele Malielegaoi.

Saunoa Auapaau Mulipola Aloitafua, “O le filifilia ai e le Komiti o Fonotoe e avea ma taitai, ua agavaa ai foi o ia e faasee atu i faamanuiaga tau le totogi, o alauni faapea le taavale e fe’afioa’i ai.

O nei faamanuiaga uma sa maua lea e Tuilaepa, a’o lei faamalolo mo le lua tausaga e pei ona faasala ai nei le Palemene.

E tele nisi o finagalo sa faalia i lenei lipoti e pei ona talosagaina ai se finagalo o le Sui Faipule o Vaimauga 1, le afioga Sulamanaia Tuivasa Tauiliili.

“Sa tatau ona tuuina mai se vaiaso se tasi e filifili ai lava e le matou vaega faaupufai so matou taitai, e aunoa ma le filifilia e le Palemene, ae ia iai so matou leo i le filifiliga o le matou taitai.”

Peitai ua faamaonia e le Palemene le lipoti e pei ona tolaulauina e le Taitaifono ma faamaonia ai loa le avea o Fonotoe ma taitai o le vaega faaupufai o le HRPP poo le vaega e Puipuia le Aia Tatau a Tagata.

O le maea ona faamaonia le lafo faatu, na valaau ai loa le Fofoga Fetali o le Maota le susuga ia Papalii Lio Taeu Masepau, i le afioga ia Fonotoe, ina ia se’ei pe afio ifo i le nofoa o le Taitai o le Itu Agai lea sa se’ei ai le afioga ia Tuilaepa Sailele Malilegaoi.

(0)