Toe Tutu Mai le Vaega Faaupufai o le Tautua

0
381

O le manulauti a le vaega faaupufai o le Tautua o le a mulimulitai iai a’o alo atu i le faigapalota o le tausaga fou, “O le taeao fou ia moni le faavae o Samoa i Le Atua, tautua ma le amiotonu, ma le manuia o tagata uma o Samoa.”

“New beginning serve to uphold justice and prosperity for all citizens of Samoa, and be true that Samoa is founded on God”.

Sa taitaia se fonotaga ma tusitala i le Aso Faraile ua tuanai atu e lē sa avea ma sui faipule o le itumalo o Salega ia Afualo Dr Wood Salele, o le Peresitene foi lea o le Komiti Faafoe ma o le fofoga foi lea o le vaega faaupufai mo le va ma le atunuu ae maise le au faaslalau.

I le tuuina mai o faiga faavae a le Tautua aua le Palota 2021, sa ia faailoa mai ai o loo taitaia le vaega faaupufai i lalo o le Komiti Faafoe e pei ona iai le saofaiga na auai i lea aso.

O e sa auai o lea komiti e aofia ai le Afioga ia Le Tagaloa Pita, Savaiinaea Taimang Jensen Leauanae, Fiso Taranaki (failautusi) faapea ai Sala Lautea Iose.

Ua toe amatalia le fesootaiga a le Tautua ma le atunuu e ala i le au faasalalau, ae maise o le tali atu i le Malo e ala i finagalo faaalia o le atunuu i ana faiga faavae.

Savaiianaea Taimang Jensen ma Le Tagaloa Pita

Sa saunoa Afualo, o le fa tausaga ua tuanai sa faavailolo lava le vaega faaupufai ina ua maea le palota ua lē manuia, lea sa na o le toalua ai sui o le Tautua sa tulai mai.

“Sa fesiligia foi e le toatele poo fea o iai le Tautua e tali atu i mea na tutupu;

“Ae ua tonu le tofa ma le faautaga o le a matou le toe tali, ae o le HRPP lea na tulai mai o le a tali iai le atunuu.”

Na faailoa e Afualo o le taeao fou o le tulai mai o le Tautua e tapena le sa o Samoa mo le palota o le 2021.

Sa lagā e le peresitene ia Afualo le mataupu i le matagaluega o le Soifua Maloloina.

Saunoa le Peresitene o le 83 soifua ua maumau e lē faigofie i le Tautua lea tulaga, ma o loo manino mai i le finagalo o le Alii Palemia, e leai se komisi suesue.

E finagalo le Tautua e tatau ona fai se komisi suesue e saili ai le tulaga tonu na lape ai le auaunaga a le Soifua Maloloina lea ua mafua ai na maliliu le toatele i le misela.

“E le po se lilo o lea ua uma ona sausaunoa le Afioga i le Alii Palemia ma ua aumai foi lona finagalo, e le faia se komisi suesue. O le mau a le Tautua Samoa e tatau ona fai le komisi suesue;

“O ai a tua iai le 83 ola ia ua maumau?;

“E le mafai ona faapea e te tulai mai e taitai le atunuu, ona fai lea o ni lafoga faapea, ae salu i lalo o le fala le tele o le numi lea e iai;

“E tatau ona malamalama uma mea, ina ia aua nei toe tupu, ma e fesoasoani fo’i ia i latou lea e galulue e atiae le atunuu;

“E uma atu tatou ae tula’i ma a tatou fanau ma fanau a fanau e fesiligia poo fea o iai. Afai foi o ana lafoga ia e faapea e maumau tupe, ou te ofo i le Alii Palemia;

“E le o ni ana tupe,,,O tupe a oe ma a’u”

Sa saunoa Afualo o le Matagaluega o le Soifua Maloloina e faitau miliona le Tala i le Tupe (Budget) e ave iai ma e tatau ona faamuamua totogi o le matagaluega.

“E toeitiiti 100 miliona le tupe e tuuina iai, ae o lea ua tatou molimauina lenei faafitauli ua tulai mai e ala i le misela.”

“O le tala faatatau o le tupe lea e latalata i le 100 miliona e tatau ona tuuina atu e siitia ai totogi o fomai ma tausimai, faapea auaunaga lagolago ma auaunaga fesoasoani;

“E aoga e taofi ai fomai, ona ua tele ina o i fafo, e ui lava foi ina fai le Iunivesite e tali mai, ae le o lelei lava;

“O lea faatoa maea nei ona tuufaatasia vaega e lua o le Matagaluega o le Soifua Maloloina, e tele naua tupe na alu ai i le tau tapenaina, ae e lē o tulai mai i se tulaga lelei le matagaluega;

“O le manatu o lenei vaega faaupufai ia aua nei toe tupu mai, ma ia alu aogā le maau o le atunuu”.

O le vaai mamao a le Tautua Party e tatau ona faatu se matagaluega e na te tapenaina le Medicare poo le laveai lea mo le soifua maloloina.

O lona aoga, e mo i latou e le gafatia ma maualalo le tamaoaiga, ma leai foi ni galuega, ae ia faaoga le fesoasoani lea e faasafua ai le manuia lautele mo tagata uma.

O le manatu ole Tautua e moni o loo iai le faiga faavae, e pei ona iai le age group o loo vaai fua pe a ma le 15 tausaga agai i lalo ae o le latou vaai, o le faiga faavae lena ua taofi ai le filifiliga saoloto a le gasegase poo fea le auaunaga e alu e saili ai lona toomaga.

O le isi anavatau a le Tautua o le faia lea o se tulafono mo insiua (medical insurance policy) mo tagata faigaluega uma o nisi faamatalaga o le a oo iai faatalanoaga a le vaega faaupufai i le vaiaso fou e amata ai.

Sa faapea mai le Peresitene o le Komiti faafoe o le Tautua, “O ai a le malo e tulai mai, o i latou o le a tausia mea totino a le atunuu.”


Maina Vai

Maina Vai of Fasitoouta is a mother of five. Maina has recently graduated with a Certificate of Customary Adjudication from the National University of Samoa.
Maina Vai