Ua ioeina e leoleo le toe tuuina atu lea o se Malu o le Malo mo le tautoaluaina o lē sa fai ma Palemia o Samoa mo le 23 tausaga, le afioga ia Tuilaepa Sailele Malielegaoi.
O lea tulaga na faamaonia mai e le Sui Komesina a le Matagaluega o Leoleo, Papalii Monalisa Tiai-Keti i se feiloaiga ma tusitala.
Saunoa Papalii, o le tulai mai o le vevesi i le vaiaso ua te’a lea sa pa’i ai se tasi o tinā matua i le laei o Tuilaepa, ua manatu ai le Matagaluega e tusa ma latou suesuega, ua tatau ona toe fa’aauauina le tiute o Malu o le Malo mo le puipuiga o lē sa avea ma Palemia o Samoa i tausaga e tele.”
“O le vaavaai a le Matagaluega, o lea faatoa matala tatou malae vaalele (borders) ma maitauina ai le saoasaoa o le agai mai o tatou tagata mai atunuu mamao..”
O le isi itu tāua e le o itiiti i le vaai a le Matagaluega, o le taimi ao fe’eseesea’i le mamalu o le atunuu i talitonuga faapatī, sa toatele ē sa latou faia saunoaga faamatau i le taitai.
O le fetuunaiga o nei itu uma, ua mautu ai se faaiuga o le a toe tuuina atu le auaunaga a Malu o le Malo i le itu tau puipuiga mo le Taitai a le Itu Agai.
(7)
