Ua toe tolopo le lauina o le faasalaga o Malele Paulo ma Lema’i Sione, i lo la taupulepule e faaoo le maliu i lē sa avea ma palemia o Samoa.
O le aoauli o le Aso Lua na toe tolopo ai le lauina o le faasalaga mo Malele Paulo ma Lema’i Sione, ina ua talia e le Faamasinoga Maualuga le talosaga a le itu a leoleo mo se taimi faaopopo ona e iai vaega o loo moomia e fia faamaeaina.
Na talia e lana afioga ia Vui Clearance Nelson le talosaga a loia o le Ofisa o le Loia Sili o loo faafoeina le mataupu.
Ua toe tolopo ai ma le faamoemoe o le Aso Faraile nei, e tuuina mai ai le faasalaga o lenei mataupu ina ua maea iloiloga o le Faamasinoga sa faamaonia ai moliaga.
E lei mamao atu na faamaonia ai e se laulau faatonu moliaga faasaga ia Malele Paulo ma Lema’i Sione i le taupulepule lea e faaoo le oti ia Tuilaepa Sailele Malilegaoi, faapea Fuiavalili Eagon Keil, o le sa avea ma komesina o leoleo.
Sa talosaga le tamaitai loia ia Unasa Iuni Sapolu, o loo tulai mo Lemai Sione, o loo iai le talosaga apili e toe iloilo ai le faaiuga a vasega faatonu na faamaonia ai moliaga. Ae sa tali Vui Clearance Nelson, “E lei oo mai se talosaga apili ia te ia.”
Ua fa tausaga o faagasolo lenei mataupu. Sa faatuai ona suesueina e le Faamasinoga ona o taumafaiga e auina mai i Samoa se tasi o alii o loo aafia i lenei taupulepulega.
O Talalelei Pauga, o loo tuuaia sa ia lafoina mai tupe i Ausetalia ma faatonutonu mai uma gaioiga e fai.
O Malele Paulo o loo tulai ai le alii loia ia Quentin Sauaga.
O lē sa faatonu e faaoo le maliu ia Tuilaepa ma tuuina atu iai le taavale ma se fana e faatino ai – sa ia ioeina moliaga faasaga ia te ia, ma o loo tuli nei lona faasalaga e 4 tausaga i le falepuipui i Tanumalala.
