Toe Tolopō i le 2024 le Mataupu a lē sā Gaoi le $1.5 Miliona mai le ANZ Samoa

0
652

O le amataga o lenei vaiaso, na tulai ai i luma o le Faamasinoga le tamaitai ia Seira Malifa, o loo tuuaia i le aveesea mai o ae tino i tupe e $1.5miliona a o avea o ia ma tagata faigaluega o le faletupe o le ANZ i Apia.

Sa ioeina e lea tamaitai moliaga e 330 a le itu a leoleo, ae teena moliaga e 25.

I faamaumauga a le itu a leoleo na fofogaina i luma o le Faamasinoga Maualuga e faapea o ni nonogatupe faafoliga (fake loans) sa faatinoina ma toe tala i tua. O le auala lea sa toe’sea ai lenei seleni mai totonu o le faletupe.

O le tausaga talu ai na lipotia ai lenei mataupu e le faletupe o le ANZ i le matagaluega o leoleo e pei ona sa saunoa iai Papalii Monalisa Tiai-Keti, ma faasolo mai ai loa suesuega a le matagaluega.

E $80,000 se tino i tupe na mua’i maua e le matagaluega, peitai o sa oo atu lava i le $1.8 miliona le aofai atoa.

Ua faatulaga foi e le Faamasinoga le Aso 18 o Iulai 2024, e toe fofogaina ai mau o lea mataupu i moliaga e 25 o loo teena.

E le’i tuuina mai e le Faamasinoga lana faalasaga e faasaga i moliaga silia ma le 300 sa ioeina e Seira Malifa.

I mataupu lava faapenei sa tulai ai foi se isi tinā sa faigaluega i le National Bank of Samoa e tali atu i ni moliaga e 177 e faasaga ia te ia.