Toe Tofia le Tama Tauaana na te faa’auauina le Tofiga Ao o le Malo

0
692

I le tauaofiaga o le fonotaga a le maota fai tulafono a le Palemene o Samoa i le taeao nei, na tomua ai se faasilasilaga mai le Fofoga Fetalai le afioga Papalii Lio Oloipola Taeu  Masipau e faapea, ua toe tofiaina nei le afioga ia Tuimalealiifano Va’aletoa Sualauvi II e na te faauauina le tofi o le Ao o le Malo e tusa ai ma le mataupu 18 (5) o le Faavae o le Malo o Samoa.

Speaker of the House Papalii Lio Oloipola Taeu Masipau.

Saunoa le Fofoga Fetalai: “E tusa ma le Vaega 18(1), o le tofiaina o le Ao o le Malo, e tofiaina e le Fono Aoao Faitulafono, e faia i le fautuaga a se vaega faaupufai o loo tula’i mai na te puleaina le Malo..

“O lea ou te faasilasila atu ai le toe tofiaina o le afioga Tuimalealifano Vaaletoa Sualauvi ll, e avea ma Ao o le Malo mo le isi lima tausaga.”

O se suiga lenei i le Faavae o Samoa sa faia e le faigamalo talu ai, ua suia ai le tofiaina o le Ao o le Malo e sui o le Palemene, ae tuuina atu i le Vaega Faaupufai o loo tulai mai e taitaia le Malo.

O le toe filifilia ai o le Tama Tauaana i le tofiga o le Ao o le Malo, o se faaiuga na tasi iai le vaega faaupufai, le Faatuatua i Le Atua ua Tasi (FAST) o loo tulai mai i le foe mo le taitaiina o le atunuu.

O le ma’ea ai ona saunoa le fofoga o le maota e faailo le finagalo autasi o le faigamalo, ma pasia ai le lafo faatu, ona saunoa lea o le tamaitai Palemia le taitai o le atunuu.

Saunoa Fiame, “O le faagasologa mai o le tofiga Ao o le Malo, sa tauave mai i le 1962 e Ao soofaatasi ia Malietoa Tanumafili ll, faapea le susuga Tamasese Meaole, seia oo ina tuumalo Tamasese i le tausaga na sosoo ai, ae faatoa tasi le tausaga talu ona tutoatasi Samoa..

“Ona tauave mai lea e le Susuga Malietoa le tofiga seia oo ina tuumalo i le Aso 11 Me 2007”.

Mo le silafia i le tusiaina o le Faavae o le Malo o Samoa, sa tuuina mai ai le aiaiga, a maea loa le paeaega a Malietoa ma Tamasese, ona le toe tuu afu ai loa lea o le tofiga Ao o le Malo, ae o le a galue i lalo o le nofoaiga ta’i lima tausaga ma palotaina i le Palemene.

Peitai e tusa ai ma le saunoaga a Fiame, “o le tausaga 2019 na faia ai foi ni suiga, e faatapulaa nao le lua nofoaiga e mafai ona tauaveina ai e se tasi..”

O lea la sa molimauina ai le suiga sa fai, ina ua ma’ea le lua o nofoaiga a le afioga i le Tui Aana, Tupua Tamasese Tupuola Efi.

I le saunoaga a le Palenia, o lea foi la ua ma’ea le lima tausaga na galue mai ai Tuimalealifano, ao lea ua toe tofia e le faigamalo na te tauaveina le tofiga Ao o le Malo o Samoa.

E tusa ai la ma suiga o le Faavae, e toe tasi la le nofoaiga.

O le isi foi suiga sa faia i le Faavae o Samoa, o le aveeseina lea o le faaupuga “Ao Mamalu o le Malo” ae tuuina iai na o le “Ao o le Malo”.