O le tuanai ai o le faigapalota tele i le 2021 sa tauva ai ae le’i manuia, ae ua manatu le Susuga i le Igoa Matua iā Fata Ryan Schuster, o le a toe saili pea sona avanoa mo le tofi o le itumalo o Sagaga 2 i le faigapalota o le 2026.
O lea ua 50 tausaga le soifua o le Susuga ia Fata Ryan o Afega ma Malie, ma o lea ua toe ave iai le faatuatuaga o le afioaga poo le isi itu o le faiganuu o Afega, ma ua saunoa Fata, e toatele fo’i i latou mai Malie ma Tuana’i, e lagolagoina ia mo le faigapalota o lo’o loma nei.
O le Aso Lua o le vaiaso nei na momoli ai e matai o le afioaga o Afega le igoa matua i le vaega faaupufai o le Faatuatua i Le Atua Samoa ua Tasi.
I se faatalatalanoaga ma le Sui Faipule faaolioli, sa ia saunoa ai, e lē uma le naunautaiga e fia tautua ma faatino se sao mo le itumalo.
“Ou te manatu o lea e maua le malosi mai Le Alii, ma o loo fia tautua pea, ma fia auauna foi mo le itumalo.”
O le tula’i mai o finauga i le va o Afega ma nuu tua’oi oTuana’i, Leauvaa ma Levi Saleimoa, o le tasi lea o vaega o loo silasila mamao iai mo se fōfō e faanofo filemu ai lea mataupu.
O nisi mataupu tāua o le toe faafo’isia lea o le vai taumafa a le afioaga o Tuana’i aemaise o nisi o atinae mo totonu o le itumalo e fesoasoani atu ai i tagata lautele.
O Fata Ryan Schuster o se matai tausi aiga, tausi nuu, ma o se tasi o matāfale malosi o le Ekalesia EFKS i Afega.
O se tasi fo’i ua tele lona sao i nisi o fuafuaga i totonu o lona lava afioaga o Afega faapea foi Malie.
E tele tausaga sa galue ai mo le atiinaeina o le lakapi i totonu o le itumalo ma avea ai o ia ma Taitai Malaga (Manager) o le Manu Samoa.
Sa avea Fata Ryan ma sui o le Komiti Faafoe (Board Member) o le Pulega o Taaloga ma Malae Taalo (Samoa Sports Facilities Authority) ae le’i faataapeina ma tuuina mai i lalo o le Matagaluega o Taaloga.
O ia o se alii faipisinisi ma o loo faaauau pea le auaunaga i taavale (rental cars).
I le faigapalota tele o le 2021, sa toatolu i latou na tauva i lalo o le vaega faaupufai o le FAST, ma le’i manuia ai, ae tula’i mai ai le Sui o le HRPP.
O le Susuga i le Igoa Matua ia Maulolo Tavita Amosa o lo’o tulai mai i le tofi o le itumalo i lalo o le fua o le HRPP.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
