Toe Tatala Faitotoa o le Aoga Loto Taumafai, ina ua mae’a Feutanaiga ma Faiaoga

0
302

O le taeao nei le aso 13 o Iuni na faamaonia mai e le tamaitai pule o le aoga a le Loto Taumafai, le Susuga ia Vaiana Otto, le toe a’e ai lea o le laumua, ina ua maea feutanaiga i le va o le vasega o faiaoga, ma le Komiti Faatonu, e uiga i le le maua ai o totogi o faiaoga.

Na saunoa le tamaitai pule, o le Aso Tofi talu na feiloai ai le aiga faiaoga ma le Komiti Faatonu, e fefaasoai le faafitauli i latou totogi ua fa masina e lei toe totogiina. O lea fa asina, e tusa ma le 7 pay ua misi. O le mafuaaga lea sa le oo mai i le galuega (strike) le vasega o faiaoga e toa 25 i le Aso Lulu 8 o Iuni.

Ae petiai, i le maea ai o lea feiloaiga, sa malielie ai loa le vasega o faiaoga, o le a toe a’e mai le aoga i le Aso Gafue 13 Iuni 2022, ma toe faaauau ai lo latou auaunaga.

“O lea la na toe taliu mai ai i le aso le aiga faiaoga, ma e leai ma se tasi e le’i a’e mai, poo faanoi mai..”

Saunoa Vaiana i se faatalatalanoaga i luga o le telefoni ma la Samoa Global News, “O lea fonotaga na saunoa manino ai le Taitaifono, le afioga ia Tagaloasa Uili Matafeo, o le taimi lava e taunuu ai le grant mai paaga a le aoga, o le a toe totogi uma le seleni a nai faiaoga e lei mafai ona maua i le taimi ua te’a.

Na saunoa foi Vaiana, sa iai se latou feiloaiga ma le Sui Ofisa Sili o le Matagaluega o Aoga faapea le loia a le matagaluega, peitai e lei avanoa ifo le Minisita o Aoga le afioga ia Seu’ula Ioane, ona o tuatuagia.

Peitai, na mafai ona faaoo ifo i lea feiloaiga se tuualalo a le Minisita e uiga i le faafitauli e pei ona tulai mai. E faapea se finagalo a le Minisita, “O lea ou te iloa le mafatiaga o faiaoga, leaga o au foi le isi faiaoga, ae o le tuualalo ia outou, onosai ma faamalolosi lo tatou faiva ua valaauina ai tatou..”

Na ta’ua e le tamaitai pule o se fiafiaga tele ia te ia, ona ua mafai ona toe a’e le aoga ona o nai fanau.

E 105 fanau e iai manaoga faapitoa o loo resitaraina i le Aoga Loto Taumafai, i lona nofoaga autu i Vaitele Fou, ae 25 alii ma tamaitai faiaoga o loo galulue mo le aotauina o nai fanau e iai manaoga faapitoa.

O le Loto Taumafai Society, e oo atu foi le latou auaunaga i aiga o nisi o le fanau e le mafai ona oo mai i le aoga (community outreach).