14 Iulai 2020. Mulinuu Apia. E le’i foi le Fa’amasinoga Maualuga e tu’uina atu se fa’asalaga fa’afalepuipui i se tasi o taule’ale’a na’o le 19 tausaga le matua, ae ua tele ma anoanoa’i moliaga o le talepe fale ma le gaoi o lo’o tu’ua’ia ma molia ai.
O ia lea o Jireh Seumanutafa mai le afio’aga o Palisi ma Falealupo i Savaii lea na tuuina mai se fa’asalaga a le fa’amasinoga i moliaga o le talepe fale ma le gaoi e pei ona aafia ai e se tina fai pisinis mai Palisi lava.
O lenei mata’upu na fofogaina i luma o lana afioga i le Fa’amasino ia Vui Clarence Nelson lea na saunoa ai lana afioga i le la’ititi tele o lenei alii talavou ae ua fau ma soloi mata’upu e molia atu ai i luma o le Fa’amasinoga.
O le tausaga ua mavae lea na fa’ato’a magalo ai mai lona fa’asalaga e ono masina na fa’afalepuipuiina ai ona o moliaga lava nei o le talepe fale ma le gaoi, peita’i o lea e fa’asolo atu lava mata’upu a lenei alii i luma o le fa’amasinoga.
I tolaulauga o lenei mata’upu na fa’aalia ai o le aso 14 o Aukuso o le tausaga ua mavae lea na osofa’ia ai e Jireh le faleoloa a se tina fai pisinisi i Palisi ma ave’esea ai lana ‘ato, ma ave fa’agaoi se tinoitupe e silia ma le $4000 atoa ai ma se telefoni feavea’i.
Mulimuli ane inu ai ma ana uo ae fa’ameaalofa le telefoni feavea’i i lana uo teine ma o ana uo uma nei lea na toe molimau lava ma ta’uina le moni o nei soligatulafono na faia e Jireh.
“O oe lava e te mafai ona fa’aleleia lou olaga, ae afai lava la e te fia mana’o e feiloa’i pea ou lima ma handcuff ona fai pea lea o au soligatulafono,” o le saunoaga lea a Vui.
E 2 tausaga ma le tolu masina lea ua tu’uina atu ai Jireh i le to’ese i Tanumalala se’i fai pe e iai se lesona mo ia i le nofo i le to’ese.
I le taimi o lana fa’ato’esega, sa ia aumaia ai ni upu mai le afioga Pa’ia a le Atua e uiga ia Paulo ma ia fa’aalia ai e fa’apea, “Oute fia pei o Paulo,
Peita’i na saunoa Vui e fa’amalulu i si nei taule’ale’a “ua tuai”.
(1)
