Ua tapena fiafia le Itumalo o Falealupo i le motu tele i Salafai mo le faigapalota tele – ina ua toe faaui i tua se lu’i na faasaga i nisi e toa 16 o le mamalu o le atunuu, ua maea ona resitalaina i le lola palota a le Itumalo.
Ua faamaonia ai nei, ma lē toe fesiligia le agavaa o i latou uma sa lu’iina, ma ua saoloto ai nei i latou e auai i le filifiliga mo le Faigapalota Tele i le Aso 27 ma le Aso 29 o Aukuso 2025.
O le faaiuga o le vaiaso nei na valaau ai lenei mataupu ma tula’i ai i luma o le Faamasinoga Faaitumalo i latou sa tuuina mai o latou suafa i se faasalalauga faalauaitele a le Ofisa o Faigapalota.
I taualumaga a le faamasinoga na tula’i ai se tasi o matai sa ia tuiina atu le lu’i – ma talosaga i luma o le faamasinoga ina ia toe faaui mai i tua le mataupu.
Saunoa le fioga ia Seumanutafa Isaraelu Seumanutafa, uma ona latou feutaga’i, latou e toafa sa tuuina atu lenei mataupu i le faamasinoga, ma ua tonu ai lo latou manatu e toe faaui i tua..
“E seu i fanua, e soalaupule ma teuteu i tua ae ia fai fiafia le palota a le itumalo o Falealupo.”
Na talia e le afioga i le Faamasino Sinia o le Faamasinoga Faaitumalo ia Talasa Atoa-Saaga le talosaga ma faatonuina ai loa le toe faaui ai i tua o le tagi sa i luma o le faamasinoga.
E toafā i latou sa faauluina le tagi faaletulafono (challenge) e aofia ai ma Seumanutafa Isarelu Seumanutafa.
Sa lata i le 100 suafa o le lola palota a Falealupo na amata ai lenei lu’i, peitai, ina ua iloilo e le Komesina o Faigapalota ma faamautinoa ai, o tagatanuu moni o Falealupo i latou.
Peitai sa faaali e nisi o le mamalu o le atunuu sa aafia o latou suafa i le lisi – o i latou na fananau, se’i tulou, i Falealupo. Ae ua faateia i latou ina ua tuuina atu le lu’i ma faatasiga ai o latou igoa i luga o upega tafailagi e tusa ai ma le faasalalauga a le Ofisa o Faigapalota.
“E ao ona iai se fuafuaga faaletulafono mo ē e lu’iina tagatanuu moni o se itumalo, auā e le avea lou lē masani i le tagata ma mea e te’i ai lava ua faaulu lau lu’i..”
O le agavaa ai o i latou nei e palota mo Falealupo, ua tula’i mai ai loa le aofa’i o le lola palota a Falealupo mo le faigapalota tele – e 844.
E toalotu Sui Tauva mo le sailiga o le tofi a le itumalo e aofia le sui e toatasi a le HRPP ma sui e toalua a le FAST.
O le afioga i le tamaitai loia ia Ae’au Leota Tima Leavaiseeta, o loo tauaveina le fu’a a le HRPP. O ia o se alo e faasino i lē sa tauaveina le Tofi a le Itumalo mo le 26 tausaga le afioga ia Ae’au Peniamina Leavaiseeta.
O le afioga ia Tuimaseve Poto Seumanutafa Fiu, ma le afioga ia Seufata Eteuati Sulutolu, o loo tamomo’e uma i lalo o le vaega faaupufai o le FAST.
Happy Father’s Day
Special Notice from UTOS
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
