Tusia: Taunuuga Toatasi, Gvt Press. Ua i ai nei le Ofisa Autū Fou o le Fa’alapotopotoga o Tagata Faigaluega a le Mālō le PSA – e pei ona tatala aloā’ia i le fa’ai’uga o le vaiaso ua mavae.
O lenei Ofisa Autū Fou e aofia ai le Fale Tele mo fonotaga fa’apea le nofoaga fa’apitoa mo le va’aia o fanauiti a le aufaigaluega.
O le tau atoa o le galuega e $589,825.58 ma e 10 masina sa fausia ai.
I le saunoaga autū a le Afioga i le Palemia iā Fiame Naomi Mataafa, sa ia toe fa’apupula ai le tāua tele o lea Fa’alapotopotoga o tagata faigaluega a le Mālō.
“O le iai o le Ofisa Autū i le maota nei, e lē taumate o le ā si’itia ai le naunau e saga matimati ai le anava ma matāfaioi a le Fa’alapotopotoga.
“O le ‘upu moni, e tua le Mālō i le aufaigaluega, e fa’apea fo’i ona tua le vaega mā’oti ma pisinisi i le aufaigaluega.
“O latou tomai ma agava’a i so’o se matātā ma so’o se fa’atufugaga, o lā’ei ia o so’o se Faigāmālō manuia. O lenei fa’amoemoe o le ā fai ma taula o le toe lalagaina o le fa’amaopoopoina o le P.S.A. ma ona nafa tau’ave.
“O se la’asaga fou i le tala’aga o le Fa’alapotopotoga, ma ou te taofi, o le pine fa’amau lea o le mā’elegā ma le vilivilita’i o tulaga tofi o lo’o i ai nei ma ona sui uma. O la latou tautua e lagomalū ma tu taumua i aso lelei, ma lave i manino i aso faigatā.
“O le aufaigaluega, o le fa’amoemoega lea o le atunu’u, latou te fa’atino lo latou valā’auina e tautua ai mo Samoa. O tatou uma o le aufaigaluega ma le au tautua a le atunu’u, o le tatou anava lea, ma le fatu’āiga tausi mo Samoa.
Saunoa Fiame, e leai lava se savaliga e ‘asa ma ni lu’itau, peita’i o so’o se lu’itau o lo’o ta’oto ai ni lesona āoga mo le lumana’i, ma saga unā’ia ai le fa’atinoina o galuega ma auaunaga.
“O le fa’amalosi i le Fa’alapotopotoga ina ia tuli i luma lo outou fa’amoemoe, ina ia mapo auaunaga o le ā fa’atino i lenei maota, auā le maopoopoga o Sui auai o le Fa’alapotopotoga.”
O le otootoga o tala’aga o le Fa’alapotopotoga lea na saunoa ai le Peresetene iā Lealaisalanoa Karameli Tuala.
O le Fa’alapotopotoga o Tagata Faigaluega a le Mālō na amata fa’avaeina mai i le tausaga e 1950, ma e ‘ese’ese lava sui sa auai i lea vaitau e aofia ai pailate ma ‘ave ta’avale o ta’avale la’upasese laiti.
Tausaga e 1960, sa i lalo o le Pulega a Niu Sila.
O le tausaga e 1962 sa Tuto’atasi ai le Mālō o Samoa ma o le tausaga e 1978 aga’i le 1980, sa tupu ai ma ola le Fa’alapotopotoga ona ua i ai alo ma fanau ua toe taliu mai i a’oa’oga sa feagai ai i atunu’u mamao.
O le tausaga e 1981, o se tala fa’asolopito e pei ona fai ai le solo tete’e a le aufaigaluega a le Mālō, ma o suiga tetele sa fanau mai le solo tete’e, o le mafuli o le to’atele ina ia saga fa’amautū pea le Fa’alapotopotoga.
Fa’asologa o Peresetene o le Fa’alapotopotoga:
• 1981: Tu’u’u Ieti Taulealo
• 1986: Pesetā Sinave Isara
• 1991: Afamasaga Faitele Afamasaga
• 1996: Falefata Tuāniu Petaia
• 2003 – 2008: Solialofi Papāli’i [Ulua’i Peresetene Tama’ita’i].
• 2009: Luamanuvae Gaugau Mateo Ah Chong
• 2016 – 2025: Lealaisalanoa Karameli Tuala
Vacancies at SPA
- Tuala Siaki Reappointed to Lead Gambling Control Authority for Another Three Years - October 9, 2026
- Faatoese le Palemia mo le Faaaogaina o le upu “Heil Hitler” i le 2007 - October 6, 2026
- 14 Ofisa Sili a le Malo na Faatautoina - September 23, 2026
