Toe Faaleleia ma Faalauteleina le Lalā a le Faletupe o Tagatanuu o Samoa le National Bank i Vaitele

0
466

O le taeao o le Aso Gafua na toe tatala aloaia ai le lala a le Faletupe o Tagatanuu o Samoa, le National Bank, i Vaitele.

E tolu vaiaso sa faatino ai se galuega o le toe faaleleia o le ofisa ma toe faatelēina, auā le aga’i atu o le mamalu o le atunuu e faaaogaina le auaunaga.

Pulega a le NBS faatasi ma le aufaigaluega o le lala i Vaitele.

Sa na o le toafā le aufaigaluega sa galulue i le lalā i Vaitele, peitai, o lea ua toa sefulu i latou i le taimi nei, ina ua ma’ea ona faatelēina le ofisa.

Toe faatelē le ofisa ma siitia ai le aufaigaluega mai le toafa i le toa sefulu lea ua iai nei mo le tautuaina o le atunuu.

E pei ona saunoa le Pule Sili Lagolago o ia foi o le Pule o Tupe (Chief Financial Officer) iā Peseta Peter Tone, o se tulaga fiafia ia i latou le Pulega, o le faaleleia atili lea o le auauanaga, ma faafaigofieina, auā le gasolo atu o le mamalu o le atunuu.

“O auaunaga uma a le faletupe o loo faatino i le ofisa autu i Apia, o lea ua mafai fo’i ona faatino i Vaitele nei.”

Faaleleia ma toe faatelē le lalā a le National Bank i Vaitele.

Saunoa Peseta, ao faia galuega o le toe faatelēina o le ofisa i vaiaso ua mavae atu, sa mafai lava ona faatino le auaunaga a le faletupe mo le mamalu o le atunuu sa agai atu i Vaitele, e ala lea i mobile vans e lua sa tutu ai.

Mobile vans e lua sa faaauauina le auaunaga ao faaleleia le ofisa i Vaitele.

Saunoa Peseta, sa mafai e Mobile Vans a le Faletupe ona faaauau auaunaga uma e tusa ai ma manaoga a le mamalu o le atunuu na agai atu.

I le toe tatala ai nei o le ofisa i Vaitele, o le a toe agai ai loa van e taamilo i afioaga i tua, e faatino ai le auaunaga, ae maise o le faafaigofieina mo le atunuu o loo tau atovaa mai i Apia poo Vaitele foi.

O le lala a le National Bank i Vaitele o le a faaauau pea taimi masani o le 9 i le taeao se ia oo atu i le 4 i le afiafi (9am to 4pm) mai le Aso Gafua i le Aso Faraile.


Take our NBS Customer Satisfaction Survey

NBS
NBS Customer Satisfaction Survey