O le atugaluga o le sui faipule o le itumalo o Gagaemauga Numera 2 le Afioga ia Faasootauloa Pati Taulapapa, po o afea o le a tafa ai le finagalo o le Alii Palemia, ma sau ai se aso e toe faafoi atu ai le nofoa o lo latou itumalo lea ua i Tumua nei, pei ona faaitumalo ai Salamumu i Upolu nei.
“O lea o lo’o o’u tagiuu ai lava ma tatalo pea i Le Atua ia alofa, ma atonu e iai se aso e toe sui ai le finagalo o le Alii Palemia, ma toe faafoi mai Salamumu i si o matou nuu, e le o se mea o le a saga tu’u ai pea.”
O le lagona o le sui sa faaalia i le Palemene i le aso ananafi ina ua maua lona avanoa e sausaunoa ai mo le talafaatatau o le tupe 2020 – 2021 lea o loo faaalia iai finagalo o sui o le maota i le taimi nei.
O le manatu o Faasootauloa, ua le toe tutusa lona malosi peitai, afai lava e maua pea, e toe sau foi i le faiga palota o le tausaga fou.
O le tulaga i tulafono taufaaofi na ia faapea mai ua tele tala iai, peitai o lea ua maea ona oo atu i le Palemia faapea foi lona nuu, o le tali a le Alii Palemia….
“E toe sui fo’i, e iai foi se taimi poo le a lava le tulaga e iai.
Na ia faaalia i le Maota o loo feutaga’i lava ma lo latou nuu ina ia taumafai pea lo latou nofoa, atonu e iai se taimi ma se aso, e tusa ma le fiagalo o le Atua.
E iai foi lona talitonuga e le na o Saleaula o loo tupu ai lea mea. Ae o le naunautai mai ona e le o talafeagai le matai i Saleaula, ma tautua ai, ae palota Salamumu i Upolu nei ma faaitumalo ai.
“O upu a le atunuu o le ala i le pule o le tautua, e le faapea e palota i Upolu nei ae a matai ona alu lea i Saleaula, pei o mea ia e atugalu iai le faamoemoe.”
O le faigapalota o le tausaga fou lea o le a faaoga ai le faatulagaina fou o nisi o itumalo palota e le gata i Savaii ae faapea foi i Upolu. O loo iai pea nisi o sui o loo te’ena lea tulafono ona o le manatu o le a suia ai tu ma aganuu a Samoa, peitai o loo tuuina mai e le Ofisa o Faigapalota, e ese lava itumalo palota ia, ae e tumau pea vaevaega faale aganuu, e le aafia.
