E le aiāina e le Faamasinoga o Fanua ma Suafa tofiga a le afioaga – O se Faaiuga Apili lea sa tolaulauina mo le afioaga o Falelatai i le aso ananafi.
Sa tolaulauina le faaiuga o se Talosaga Aipili a le afioaga o Falelatai, ua faaleaogaina ai se faaiuga na tuuina mai i le aso 26 o Ianuari 2018.
O le faaiuga o le 2018 na talia ai le talosaga a Anae Misa Pita ae teena le talosaga a Nanai Misa Moemai ma isi. Sa talosaga Anae Misa Pita e faaleaogaina se faaiuga a Falelatai e faatulaiese ai Anae Misa ma isi mai Falelatai. Sa ia talosagaina foi le toe fo’i i o latou tofi sa iai, o le taitaifono ma faaaloaloga, ma ia faleaogaina tofi o taitaifono ma faaaloaloga sa fai e le itu a Nanai Moemai ma isi.
O fesili sa tuuina atu e le afioaga o Falelatai i le latou Talosaga e Apili ai le faaiuga o le 2018 e faapea:
1. Pe iai se puleaga a le Faamasinoga o Fanua ma Suafa i le filifiliga ma le tofiga o taitai o afioaga ma alalafaga.
2. Pe faataute’e le mamafa o molimau o faiga suesuega ma le faaiuga 2018.
O le o’o atu ai o lenei mataupu i le faamasinoga na mafua mai i le tausaga 2017 ina ua aafia le faafeagaiga sa tausia le EFKS i Siufaga ia Opapo Soana’i ma lona faletua i le faaiuga a le Komiti a le au Toeaiina o le EFKS ma faia ai se faaiuga e tatala le feagaiga a le Susuga ia Opapo ma Siufaga i Falelatai.
O le susuga ia Opapo lea sa vaaia ai faailoga o manu’aga o Iesu i lona tino, ma ua fa’aulufale atu fo’i e le susuga Opapo le faatusa o Iesu ma Maria i lo latou falesa i Siufaga. Sa saili fesoasoani le Susuga Opapo i le Afioga ia Anae Misa Pita, a’o tulai mai ai ma ta’ita’ifono o le EFKS i Matautu Falelatai i lea taimi.
O le manatu e fesoasoani atu e ala lea i se tuualalo i le toeaina o Senara ao tulai mai ma Taitaifono o le EFKS i lea taimi.
O lea lava fo’i vaitau sa maua ai ni tu’uaiga faasaga atu i le toeaina o Senara, ma sulufa’i atu ai fo’i i le Afioga ia Anae Misa Pita i lona maota i Vaivase, peitai mulimuli ane ai e le faamaonia tuuaiga, ina ua maea le suesuega a le afioaga o Falelatai i lea mataupu.
O le aso 17 o Mati o le 2017 lava na fono ai loa le nofo a faaaloaloga o Matautu Falelatai e tatala le feagaiga ma Senara.
Sa lei autasi le afioaga, ma faia ai loa le tonu e le itu tetee lea sa tulai mai ai Nanai Moemai ma isi e suia faaaloaloga o aiga, ao loo tulai mai pea Anae Misa Pita ma isi i o latou tofiga. O lea fuafuaga na tulai ai le tootoo e faatulaiese ai Anae Misa Pita ma isi mai Falelatai.
O mafuaaga o le faatetea ai o Anae Misa Pita ma isi, ona fai mai le mau a le itu a Nanai Moemai ma isi:
1. Ia lavea’i le faifeau Matautu mai le tatala ai o le feagaiga
2. Ua sāua tele le pule a Anae Misa Pita o le a faate’a ai le faifeau e leai sana mea ua sese
3.Ua soli le faavae o le nuu, o le ala lea o le to’oto’o o le nu’u
O le ala lea o le faaulu ai o le talosaga a le Afioga ia Anae Misa Pita ma isi, ma faatino ai le uluai suesuega a le faamasinoga, ma tuuina mai ai loa le faaiuga lea o le 2018.
O le finauga a le itu faamasinoga a le Afioga ia Anae Pita latou te talitonu o le faavae afai e toe faaa’e se faaaloaloga poo se taitaifono, e toe fo’i lava i lona tofiga, latou te talitonuina o se faavae lelei e atagia ai foi pulega lelei.
Sa le’i faamalieina le afioaga i le faaiuga na tuuina mai e le faamasinoga, e toe faaa’e Anae Misa Pita ma isi i le nu’u, ma toe faafo’i o latou tofiga sa iai o le taitaifono ma faaaloaloga o aiga. O le ala lea o le toe faatoai mai o le talosaga apili i le faamasinoga lea na tolaulau i le aso ananafi lona faaiuga.
Sa talia e Falelatai le toe faaa’e o i latou na faate’a ona o la latou aia tatau e le mafai ai ona faateaeseina se tagata mai lona fanua peitai sa teena le tulaga o le faaa’e o i latou nei ma toe fo’i atu i o latou tofiga.
O le faaiuga la a le faamasinoga ua talia ai le talosaga apili a le afioaga…ma o tulaga o loo tuuina mai, e toe faaa’e le Afioga Anae Misa Pita ma isi i le afioaga o Falelatai, ua talia foi e le faamasinoga le finau atu o le talosaga a Falelatai, e le aiaina e le faamasinoga tofiga a nuu ma afioaga atoa foi ma le taitaiga.
Na faailoa e Anae Misa Pita i le aso “Ua loa aso o tiai aiga, ae aua le popole e aumai lava e Le Atua le laolao lelei e toe fo’i atu ai, peitai sei faatali i se tala mo se aso e toefo’i atu ai”
O upu foi o le leleiga sa tele ina tautala mai ai le faaiuga o le faamasinoga, atoa ai ma le vaai maualuga i le mamalu o pulega a lenei Afioaga i lo tatou atunuu, e le tau aoia le tofa i le aiga Tauaana.
Na taua foi e Nanai Faamanu Ivara le o loo tulai nei i le taitaifono o le afioaga i le nofo a faaaloaloga ma o latou aiga,
“Ua faafiafiaina le nuu nei ua talia le talosaga, ina ia aveese le faaiuga e toe foi atu i latou nei ona toe foi lea i o latou tofiga o le taitaiga o le afioaga ma aiga, ae o le mataupu i le toe faaa’e atu e le mafai e Falelatai ona taofia o loo aiai i le tulafono, ae mo le taimi nei o le a faatali i latou nei mo le fesootai mai mo le aso e toe fo’i atu ai i Falelatai.”
