Toe Amio Leaga i se Afafine Nofo Aoga

0
2304

O le aso ananafi lea na fa’asalaina ai e le Fa’amasinoga Maualuga se alii e suafa ia Mikaele Petelo, 42 tausaga le matua mai Laulii ina ua ia faia ni feso’ota’iga tau feusua’iga ma se teineititi e 12 tausaga.

O lenei teineititi o se tei o le toalua faaipoipo o Mikaele, sa aumai e nofo aoga ia la’ua ona e mamao i tua i se tasi o afio’aga le nuu e aumau ai matua ma le aiga o le teineititi lenei na a’afia.

Sa suesueina lenei mataupu ona sa teena e Mikaele Petelo ona moliaga uma. Ae peitai, ina ua maea suesuega a le faamasinoga, sa momoli mai ai le faaiuga a le Afioga i le Faamasino ia Tafaoimalo Leilani Tuala-Warren i le Aso 3 o Aukuso, e faamaoniaina ai le solitulafono a lea Alii i ni moliaga se 4.

I le taimi o le fa’alavelave i le tausaga ua mavae, e na’o le 12 tausaga o le teineititi na a’afia ma sa ave lana vasega 9 i le kolisi tulaga lua sa a’oa’oina ai o ia.

I le tuuina mai o lenei faaiuga sa matuai faamamafaina ai e le Faamasino iaTafaoimalo Leilani Tuala-Warren le tāua o le tausiga lelei ma le faamaoni o fanau nofo aoga i totonu o aiga.

Sa faamamafa e le Faamasino le tulaga lē manuia ua faatino ai e Mikaele Petelo nei amioga mataga, ma ia agaleagaina se teineititi o loo nofo aoga, ma aumau ia te ia.

Justice Tafaoimalo Leilani Tuala-Warren.

Sa saunoa Tafaoimalo, o le nofo aoga e lē o se tulaga fou i totonu o Samoa ma e toatele lava nai fanau o loo tuu mai e nonofo i aiga o loo tu taulaga, pe lata ane foi o latou fale, i le mea o loo iai aoga lelei.

“O le nofo a’oga e ta’atele i Samoa ma o se avanoa mo nai matua e ave ai nai a latou fanau i a’oga pito i lelei, ma ua tu’u atu le fa’atuatuaga sili ona maualuga o nai matua mo le va’aia lelei o nai fanau a’oga, ma ia tausi e pei lava o ni a latou fanau. O le tulai mai o uiga mataga fa’apenei i nai fanau nofo aoga, e matuai le taliaina lava”.

Sa faamamafa foi e le Faamasino le faatauaina o le taofia nei loa o amioga mataga ua maituina o loo faia pea e tamā matutua, agai atu i fanau teine laiti.

I tolaulauga a le itu a leoleo o lo’o ta’ua ai e fa’apea, e lua lava po sosoo o tolotolo le tamā lenei i se potu o le fale o loo momoe faatasi ai le teineititi ua a’afia, ma nai ona tausoga.

E faapea o le aso 14 ma le aso 15 o Aukuso i le tausaga ua mavae, na alu atu ai lenei tamā ma fa’atino ni feso’ota’iga tau feusua’iga i le teineititi lenei e ala i le tagofia o lona itutinosa (se’i tulou), faapea ma isi itu o lona tino.

O le alii o lo’o molia e fa’apea e faigaluega i le Matagaluega o le Soifua Maloloina. O lo’o ta’ua i le fofogaina o le faaiuga a le afioga i le tama’ita’i faamasino, e le’i iai se fa’aleleiga i le va o matua o le teineititi na a’afia ma le alii o lo’o molia ona e le’i taliaina lana fa’ato’esega na fa’aauala atu i le tina o le teineititi na tagi.

I le taimi o le fa’alavelave i le tausaga ua mavae, e na’o le 12 tausaga o le teineititi na a’afia ma sa ave lana vasega 9 i le kolisi sa aoga ai.

O le itu e ogaoga ai le soligatulafono lenei e pei ona saunoa iai Tafaoimalo, o le va o tausaga o le teineititi na a’afia ma le alii o lo’o molia; e 29 tausaga e va ai.

E le gata i lea o le solipala o le fa’atuatuaga na avatu iai i le o lo’o molia e va’aia fa’alelei ai si nei teineititi a’o nofo a’oga ai ia te ia.

Saunoa Tafaoimalo o le isi itu e ogaoga ai ona e aiga fa’aletulafono le teineititi o lo’o a’afia ma lenei alii o lo’o molia ma o se mata’upu fa’alotoifale aemaise foi o le fa’alua ona tula’i mai ia fa’atino ma e soso’o foi po na fa’atino ai.

I le tu’uina atu o se fa’asalaga a le Fa’amasinoga i le alii o Petelo na fa’aalia ai e Tafaoimalo, le ogaoga o nei ituaiga soligatulafono o lo’o tutupu mai pea ma a’afia ai teineiti laiti ma o le fa’amanatu a le fa’amasinoga ia te ia aemaise o i latou uma o lo’o fuafua e fa’atino, o le to’ese lava le tali mo so’o se tagata e na te faia nei uiga mataga fa’apenei.

E tolu tausaga i le to’ese se fua amata na faia ai le fa’asalaga a Tafaoimalo, peita’i na to’esea mai ai le 4 masina na to’esea mai i suiga ua va’aia i le salamo o lenei alii, 6 masina na to’esea ona o uiga lelei na fa’aalia I molimau a lana fa’afeagaiga ma nisi o lona aiga faapea ma le pulenu’u, 6 masina to’esea mo lana fa’ato’esega i le tina o le teineititi na a’afia, ma le isi 3 masina mo le salamo moni.

Na totoe mai ai le tausaga ma masina e 5 e tuli e lenei alii i le to’ese mo moliaga e fa na tu’ua’ia ma fa’amaonia.


Marieta H Ilalio