10 Setema 2020, Mulinuu Apia. E to’atolu tagata sa fa’afaigaluegaina e le Samoa Sportslotto (Gambling Control Authority) lea ua latou ioeina moliaga o le gaoi a’o avea ma tagata faigaluega e pei ona tu’ua’ia ai e le itu a leoleo.
Ua ioeina e le tamaitai o Ulalia Salufau le moliaga a leoleo e faapea sa ia gaoia se tinoitupe e $352.80 lona aofaiga atoa, i le va o Me ma Iuni i le tausaga nei. O le tama’ita’i loia ia Aeau Tima Leavai sa tofia e tu mo le ua molia, ae totogi e le Malo (legal aid lawyer).
O le isi tagata faigaluega na ia ioeina ona moliaga o le alii e suafa ia Pio Paepae. Ua ia ioeina moliaga e 10 o le gaoi a’o avea ma tagata faigaluega, ma sa tolaulauina i le Faamasinoga e faapea sa ia faia lenei soligatulafono i le va o Aukuso 2019 ma Iuni o le tausaga nei. O le faitau aofa’i o le seleni na ave fa’agaoi e Paepae, e $2,383.39. E le’i iai se loia na tula’i mo Paepae ona na ia finagalo lava e tu lava ia mo ia e tali i ona moliaga.
Sa faapena foi ona ioeina e le tamaitai o Masela Moananu Masoe lona avea faagaoi o se tinoitupe e $691.80 ma e fitu (7) moliaga ua ia taliaina. a faigaluega, e pei ona tolaulauina le aofa’iga o tupe a le Samoa Sportslotto lea na ia ioeina lona avea fa’agaoi e o’o atu lona faitau aofa’i i le $691.80.
E toasefulu le aofai o tagata faigaluega a le Samoa Sportslotto o loo feagai nei ma moliaga ina ua maua e le Kamupani ni faiga faagaoi e sei ai le palaka o masini, ona le lesitalaina ai lea o pepa lotto i le sei o vaiaso taitasi, ae o loo latou avea pea seleni mai tagata faatau.
Na saunoa le Fa’amasino Sili sa ia faasoloa mataupu o le vaiaso i luma o le Faamasinoga Maualuga, o le a tu’ufa’atasi uma lava mata’upu a tagata faigaluega nei e to’a 10 a le Samoa Sportslotto e pei ona vala’auina i le vaiaso nei, e toe fofogaina i le Aso Gafua o le vaiaso fou, 14 o Setema, ma o le a fetu’una’i ai se aso e fofogaina ai se fa’asalaga a le Fa’amasinoga Maualuga mo i latou nei e to’atolu.
E toatasi le tagata faigaluega lea ua ia te’ena ona moliaga e ono (6) o le gaoi a’o avea ma tagata faigaluega. O Talosaga Wales Amosa sa tuuina atu lana tali i le Faamasingo e tauala atu i lana loia, o Tanya To’ailoa.
O le isi to’aono o tagata faigaluega a le Samoa Sportslotto o lo’o ua toe tolopo mo le aso 14 o Setema a latou mata’upu, ae se’i iloiloina e a latou loia moliaga ua faia fa’asaga ia i latou.
