E toatolu tama taaalo o le ‘au a le atunu’u le Manu Samoa lea ua filifilia faakonakarate e au a le taamilosaga o le Supa Rugby mo le tausaga fou 2020.
O le alii o Michael Alalatoa ua faatolu ona siamupini i le au a le Crusaders ma ua toe tofiaina nei lenei alo o Samoa e toe faaauauina lona taalo ai mo le ‘au a Canterbury.
O Michael Alalatoa o le uso o le alii o Allan Alalatoa lea e taalo mai i le au a Ausetalia le Wallabies.
O Michael lea sa ia tuua lona auai atu i le taamilosaga o le Mitre 10 i le amataga o le tausaga nei, ae faamuamua lona naunautaiga e taalo mo Samoa i le ipu a le lalolagi lea ua maea atu nei.
O le alii o Kane Leaupepe lea sa vaaia le taalo malosi mo Samoa i le ipu o le lalolagi, ua faailoa foi le iai o lona suafa i le lisi o le ‘au a le Hurricanes.
E lei taua Leaupepe i le uluai lisi a le Hurricanes i le taamilosaga o le tausaga nei, ona o manuaga, ae sa valaauina lava mo le ‘au a le Hurricanes.
I le maea ai o le taamilosaga o le ipu a le lalolagi i Iapani lea sa maitauina ai le maoae o le taalo a Kane Leaupepe mo le Manu Samoa, ae toe faamanuiaina ai loa i le konekarate mo le Supa Rugby mo le taamilosaga o le 2020.
O le alii o Ray Niuia mai le au a le Highlanders o le a me’i atu nei e taalo mo le au a le Auckland Blues i le tausaga fou.
O Niuia sa taalo ai mo North Harbour mo tausaga e tolu, alu ane ai loa i Tasman i le taamilosaga o le ipu o le Mitre 10 a Niu Sila. O i la sa tofia atu ai loa i le au a le Otago Highlanders.
Sa fai Niuia ma hooker numera tasi mo le Manu Samoa ina ua faamalolo mai Motu Matuu i manuaga tau concussion.
Sa le tele sona taimi i luga o le malae i lenei tausaga mo le Highlanders ae atonu o le a suia nei le faaopoopoina o ona taimi i le malae lakapi mo lana ‘au fou, le Auckland Blues.
(0)
