Valu tagi ua faaulu e faasaga i le tina o loo tuuaia i le taufaavalea.
I le feiloaiga a le Matagaluega Leoleo ma le vasega o tusitala i le Aso Lulu, na saunoa ai le Sui Komesina le afioga ia Papalii Monalisa Tiai Keti, e faapea e toavalu i latou ua tuuina atu ni tagi tusitusia e faasaga i se tina ua tuuaia i le taufaavalea.
“Ua aafia nisi o le mamalu o le atunuu i faiga taufaavalea a lea tina, ma o lea foi ua ma’ea ona faatino moliaga, ae o le taimi nei o loo tausailia e leoleo”.
O le tamaitai o loo tuaia nei, o loo ia faa’aogaina le igoa o Lynn Nauer, ma o loo faapea mai, o ia e sau mai afioaga o Lepea ma Laulii.
Tå’ua e Papalii, e lē o mautinoa foi e le Ofisa o Leoleo poo lona suafa moni lea ma lona afioaga sao lea.
Ua tatalo mai ai le Sui Komesina i le atunuu ia mataala i nei faiga taufaasese.
Mo i latou o loo fia maua avanoa galuega faavaitaimi e lelei ona agai sa’o i le ofisa o le Matagaluega o Pisinisi, Alamanuia ma Leipa e fitoitonu ma galuega faavaitaimi.
Sa momoli mai foi le lapataiga a leoleo, ona o lenei foi taimi ua tatala mai avanoa mo le sei o le Quota mo Niu Sila.
Saunoa Papalii ina ia mataala lelei, nei alia’e mai foi ni faiga taufaasese i le faatumuina o form o le quota.
Pei ona lipotia, e lei mamao atu na molimauina ai nisi o taulelea, ina ua aafia i lenei tamaitai.
Sa faapea mai lenei tamaitai o ia e faigaluega i le MCIL ae o loo mafai ona ia faia avanoa mo galuega faavaitaimi. Lea na tuuina atu ai loa ni seleni tai $250 e nisi o tamā, ao nisi e lei faia tusifolau sa ave iai le tai $500 tala.
Sa faalua lelei ona oo atu nei taulelea i le malae vaalele ae leai ni igoa i lisi malaga.
Peitai ua faasoa mai ē sa aafia i le maasiasi sa latou oo iai, ona ua maea faamavaega ma aiga, ekalesia faapea le nuu,
Sa molimauina foi i le vaiaso atu i tua, i le taulaga i Apia na tamomoe ai nisi o taulelea e tuliloa le taavale a lea tamaitai ina ia toe faafoi mai latou tupe.
(1)
