Sa tolopoina le lauina o se i’uga a le Faamasinoga Maualuga e fa’asaga i se tasi o tama’ita’i ua ia ioeina ni moliaga o le taufa’avalea ma le gaoi atoa ai ma le saini fa’amalosi o ni siaki mai se tusi siaki a lē o loo tagi i lenei mataupu.
E tusa o tolaulauga a le Fa’amasinoga e tusa o lenei mata’upu, o le tama’ita’i o lo’o molia ia Winnienora Stowers, na fetaui ma le tama e 64 tausaga o lo’o tagi i lenei mata’upu, i se fale kalapu i Sogi ma fa’amasani loa iai ma i’u ai ina o ma lea toeaina i le ta’avale a le toeaina.
O le po lava lea aso 19 o Me o le tausaga ua mavae, lea na talosaga ai le tama’ita’i lenei o lo’o molia i l tama lenei, pe mafai ona ia fa’aaogaina lana ta’avale e feavea’i ai teu fugala’au o le latou pisinisi.
Na ioe iai le tama lenei, peita’i e lua vaiaso ua fiu e tu’uvili e le tali mai le tama’ita’i lea, ma le toe sau ai lava e faafoi le taavale o le ua tagi.
Ae i totonu o le ta’avale lenei a lenei tama, o lo’o iai lana tusi siaki. Sa faaogaina e Stowers le tusi siaki e saini faamalosi ma taufaasese ai ni supamaketi, faapea ma se ave taxi.
O le supamaketi muamua o le faleoloa o Ene i Tanumapua lea e $315 tala se fa’ata a Stowers sa fai ai, ma saini fa’amalosi ai se siaki mai le tusi siaki a le o loo tagi.
O le isi faleoloa na a’afia o le faleoloa o Fia i Vaitele-Uta lea e $900 se fa’atau na fai ai, ma ma toe tuuina atu ai foi se siaki o lenei lava tusi siaki e totogi ai le faatau.
Ina ua tu’uina atu e nei faleoloa ma aunauga nei siaiki i le faletupe o le BSP, sa toe te’ena mai, ona o le sese le saini.
O le isi tagata na mafatia i faiga taufa’avalea a le tama’ita’i, o se tama ave ta’avale la’upasese ina ua maea se atoa o feavea’i le tama’ita’i lenei i le taxi a lea alii. Ina ua fai atu le ave taavale laupasese e $150 le tau o le taxi, ae saini ifo e Stowers se isi foi siaki mai le tusi siaki lenei, e $250 ma lana tala, o le $100 tala e faameaalofa ai ona o le umi o le taimi o la feoai.
Sa ioeina e Winnienora Stowers moliaga uma o loo faasaga ia te ia, ma o le a fofogaina lona fa’asalaga i le Aso Tofi o le vaiaso lenei i luma o le tama’ita’i Fa’amasino ia Mata Tuatagaloa.
O loo tulai mo Stowers le tamaitai loia ia Maureen Tuimalealiifano ae o Anne Matalasi o lo’o tulai mo le itu a leoleo i le su’esu’eina o lenei mata’upu.
(5)
