Sa tula’i se matai e toatasi i luma o le Faamasinoga Maualuga i le vaiaso nei, e tali atu i ona moliaga o le taumafai lea e faaoo le oti i lē sa aafia i le faalavelave i Lefagaoalii.
O le isi toasefulu ma le tasi, o loo molia i le Fa’amasinoga Faaitumalo i Tuasivi i moliaga e aofia ai le faaoolima (assault), faaoo manu’a (actual bodily harm), o le ave faamalosi (kidnapping) ma le ulufale e aunoa ma se faatagana (trespassing).
O le tamā e suafa ia Aitau’ia Ioasa Lemau, na talosaga i luma o le Faamasinoga Maualuga e tau ala atu i lana loia, Su’a Alex Su’a, mo se avanoa e tatala ai o ia i tua e tālia ai taualumaga o le Faamasinoga.
Peitai, na teena e le itu a leoleo lea talosaga, ona e lei faamautu mai moliaga e le Ofisa o le Loia Sili (Prosecution).
Sa talia e le Afioga i le Faamasino ia Niava Mata Tuatagaloa, le talosaga a le itu a leoleo mo se vaiaso e faatulaga mai ai moliaga.
O le Aso Gafua o le vaiaso fou o le a toe fofogaina ai lea mataupu, ae o se avanoa foi lea ua tuuina atu i lē o loo molia e feutaga’i ai ma lana loia, ona faatoa tuuina mai lea o sana tali i moliaga.
O Aitau’ia Ioasa Lemau, sa taofia mai e leoleo, ma molia i le moliaga o le taumafai lea faaoo le oti (attempted muder) i le afioga ia Sooalo Asiata Alaimanuomalo Lepa Vitale Tuu, lea sa faatalanoa e le afioga ia Tui Eddie Taualapini o le ETLive.
Sa vaaia i se ata video i luga o le Facebook, o loo saisai ma tui mai i le amo lenei tamā e 72 tausaga o lona soifua.
O le isi toasefulu ma le tasi, o loo molia i le Faamasinoga Faaitumalo e pei ona saunoa iai le Komesina le afioga ia Auapaau Logoitino Filipo.
Sa fesiligia e le Samoa Global News le afioga i le Komesina pe le tatau ona molia uma ē sa faitonu ma faaiugafonoina le tui i le amo o Sooalo, ma faatasiga i luma o tagata lautele, ma faaoo iai le oti e tusa ai ma le faaiuga e tao i le umu, se’i tulou.
Peitai o moliaga o le toatele o i latou, ua tuuina atu lea i lalo o le Faamasinoga Faaitumalo, lea e faamoemoe e fofogaina i Tuasivi i le vaiaso fou.
O loo faa’auau pea ona nofo taofia le tamā ia Aitau’ia Ioasa Lemau i Tanumalala, i lalo o le vaavaiga a leoleo.
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
