Aso Lua 03 Oketopa 2023 Apia Samoa. E toalua nisi o le mamalu o le atunuu sa malaga mai le pasi a le Laumosooi ua maliliu. O se tamā na maliu i le falemai i Motootua, ma se isi fo’i tamā na maliu mai lona aiga i Tafatafa.
E toatasi le maliu sa faamaonia mai e le Sui Komesina o Leoleo, afioga Papalii Monalisa Tiai-Keti. O le tamā matua mai Poutasi sa maliu i le falemai i Motootua. O ia o se tasi o pasese e toafa lea sa taofia i le ICU.
Ae peitai, o le isi tamā mai Tafatafa, sa molimauina e lona aiga, sa moe i le po o le Aso Gafua, ma maliu atu ai lava o ia.
Sa togafitia i le falemai ina ua tupu le faalavelave, ae sa toe te’a lava i tua i le Aso Gafua. I se molimau a le aiga, sa faateia i latou ina ua maua atu o ia, ua maliu i le vaveao o le Aso Lua, ae le’i atoa le 24 itula talu ona tula’i mai le faalavelave.
Ina ua tupu le faalavelave i le Aso Gafua, sa lipotia mai ai e leoleo, e toafā le pasese sa taofia i le ICU, ae toa luasefulu fitu sa togafitia ma toe tete’a i tua.
O isi tulaga faaletonu o lenei faalavelave e pei ona faamaoniaina mai e leoleo, e leai se laisene a le ave pasi, ae le’i pasiaina foi le pasi a le kamupani o le Laumosooi.
Saunoa le Sui Komesina ia Papalii MonalisaTiai-Keti, “I suesuega a leoleo, e leai se laisene o lē sa ia faafoeina le pasi, ae e lē o pasia foi le pasi i lona tulaga e tatau ai ona faataga ona fealuai i luga o le auala.”
O le pasiaina o taavale afi faapea ma laisene taavale, sa aveese atu mai le auaunaga a leoleo, ae toe faamatuu atu i le Matagaluega o le LTA i le Aso 01 Iulai 2022.
Na saunoa Papalii, i le tulaga lava ia o taavale afi ma taiala, o loo manino mai a latou faamaumauga, e le’i pasia i tulaga o loo iai le pasi lea sa aafia i le faalavelave – laisene MO 123.
“Ae o loo sāili atu i le taimi nei i le vaega e pulea taavale afi (LTA) poo iai i le latou lisi o pasigā taavale ia Setema le pasi lea na tupu ai le faalavelave..”
Ua silia ma le 10 tausaga o fealuai pasi le na faafoeina le pasi, o le alii e suafa ia Moana.
Sa ia faafoeina pasi a le Laumosooi i Falealili, Siumu ma Falelauniu.
Ae o lea faatoa māua atu mai le Matagaluega o Leoleo, e leai sona laisene ave pasi (commercial license for public transport).
O le ave pasi, o loo togafitia nei i le falemai i Motootua. Ae ua saunoa Papalii, “E iai moliaga e molia ai le ave pasi pe a maea tulaga o loo togafitia ai ona manu’aga, ma te’a ai i tua..”
E lei faamautinoaina mai e leoleo, poo a moliaga e ono molia ai le kamupani o le Laumosooi, poo ē ana le auaunaga o pasi poo ē foi e faafaigaluegaina le ave pasi (employer).
Job Vacancies
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
