E toalua ni tamaiti aoga ua molia nei e leoleo ona o vevesiga sa tulai mai i le va o kolisi maualuluga.
O ni fanau aoga mai le kolisi o Sagato Iosefo ua molia i le faa’aupegaina poo le umiaina lea o se au’pega matautia (armed with dangerous weapon).
O vevesi sa tulai mai i le va o Lefifi ma Sagato Iosefo, e pei ona faamaonia mai e le susuga Papalii Monalisa Tiai Keti, o le Sui Komesina o le Matagaluega o Leoleo ma Falepuipui.
Na saunoa le Sui Komesina, “O toa 19 fanau mai nei kolisi e lua, ua maea ona tuuina atu iai se feau lapatai (formal warning).
Tā’ua e le Sui Komesina o se tulaga lelei tele ona ua maea ona faaleleia le va o nei aoga, ae peitai, “e le mafai ai ona punitia le fa’aauau pea lea o suesuega a le matagaluega aemaise o le moliaina lea o i latou ua soli le tulafono.”
O le aso ananafi sa faatino ai se faaleleiga i le va o le Kolisi Sagato Iosefo ma le Kolisi o Leififi, ma toe auli ai mea sa faaletonu ma faalelei ai le va o fanau aoga.
Tā’ua e le Sui Komesina le auai ai lea o le Komesina o Leoleo le afioga ia Auapaau Logoitino Filipo, i lea faaleleliga.
I lea tulaga ua tuualalo mai ai le Sui Komesina ina ia tautuana e le fanau aoga, e lē ‘alo lava le matagaluega i le faatinoga o lona tiute o le faamalosia o le tulafono. Ma e iai lava moliaga pe afai e tulai mai ni soligatulafono.
Ua lapatai mai foi e le Sui Komesina le mamalu o matua ina ia tautuana le tatou tiute o le fautua ma vaai lelei le fanau ina ia alo ese mai aafiaga o soligatulafono, aemaise foi le laumua i faiaoga ina ia tutu faatasi e taofi vevesiga ma le femisa’ai o fanau aoga.
(2)
